Në një ceremoni të zhvilluar gjatë Forumit Ekonomik Botëror në Davos, Zvicër, Presidenti amerikan Donald Trump dhe udhëheqës ndërkombëtarë nënshkruan detajet e Bordit të Paqes për Gaza-n, një organ i krijuar për të mbikëqyrur rindërtimin e territorit. Nga rajoni, Kosova ishte e përfaqësuar nga Presidentja Vjosa Osmani-Sadriu.
Në ceremoni morën pjesë udhëheqës dhe ministra nga 19 vende si: Bahrain, Marok, Argjentinë, Armeni, Azerbajxhan, Bullgari, Hungari, Indonezi, Jordan, Kazakistan, Pakistan, Paraguai, Katar, Arabia Saudite, Turqi, Emiratet e Bashkuara Arabe, Kosova, Uzbekistan dhe Mongolia.
Shumë vende kryesore, përfshirë Kanadanë, Francën, Gjermaninë, Italinë dhe Britaninë e Madhe nuk ishin të pranishme. Disa refuzuan ftesën dhe të tjera po e shqyrtojnë ende pjesëmarrjen.
Bordi Ekzekutiv
Shtëpia e Bardhë konfirmoi një Bord Ekzekutiv për të operacionalizuar vizionin e Bordit të Paqes. Anëtarët e tij janë:
-
Marco Rubio, Sekretar i Shtetit, SHBA
-
Steve Witkoff, Emisar Special i SHBA-së për Lindjen e Mesme
-
Jared Kushner, dhëndri i Trump
-
Sir Tony Blair, ish-kryeministër i Britanisë së Madhe
-
Marc Rowan, CEO, Apollo
-
Ajay Banga, President i Bankës Botërore
-
Robert Gabriel, këshilltar sigurie
Reagime nga Palestinezët
Kreu i Autoritetit Kombëtar Palestinez, Mohammed Mustafa, tha se dëshirojnë të punojnë me Bordit e Paqes dhe Komitetin Ekzekutiv për të siguruar që të realizojnë detyrat e tyre dhe për të përgatitur institucionet palestineze për rindërtimin e Gazës.
