Pushimet janë zakonisht një kohë për festime dhe gëzim, por për shumë njerëz, ato janë gjithashtu tepër stresuese. Dhe nëse niveli juaj i ankthit po rritet këtë dhjetor, nuk jeni vetëm.
Gati 41% e të rriturve thonë se stresi i tyre rritet këtë periudhë të vitit. “Mendoj se ka ngushëllim për faktin se nuk je i vetëm që ndihesh super i stresuar”, thotë ekspertja e lumturisë Jessica Weiss.
Weiss ka kaluar më shumë se një dekadë duke mbajtur fjalime dhe duke bërë seminare rreth lumturisë në punë, duke përfshirë një fjalim TED të titulluar ”Lumturia: Është një punë e brendshme”. Këtu janë këshillat e saj se si të përmirësoni disponimin tuaj këtë sezon.
1. Ruani lidhjet sociale
Për Weiss, kur ndiheni të stresuar, “gjëja më e rëndësishme është të ruani lidhjet sociale”, thotë ajo.
Këto mund të jenë me familjen dhe miqtë dhe nuk duhet të zgjasin shumë. “Po flas për 10 minuta,” thotë ajo. Një mënyrë ideale është që ato të ndodhin personalisht, por nëse duhet të jenë me telefon, ose me mesazh, kjo është gjithashtu mirë. Mundohuni të keni të paktën dy momente lidhjeje në ditë.
“Edhe momentet e shkurtra të një ndërveprimi pozitiv do të rrisin lumturinë dhe do të reduktojnë stresin,” thotë ajo.
2. Mbani rutinën tuaj
Së dyti, çfarëdo që të sjellë sezoni i festave për sa i përket një sërë aktivitetesh sezonale, “mbani rutinat tuaja të rregullta”, thotë ajo.
Për Weiss, është ushtrim, por “ndoshta rutina juaj e rregullt është leximi për gjysmë ore në mëngjes”, thotë ajo. “Ndoshta rutina juaj e rregullt është të bëni punën e frymëmarrjes përpara se të filloni ditën, apo ndoshta rutina juaj e rregullt është të relaksoheni me një banjë të nxehtë.”
3. Thuaj “jo” kur të duhet
Së fundmi, në këtë periudhë të ngarkuar të vitit, është e lehtë që axhendat të mbushen shpejt, por nuk keni pse të pranoni çdo ftesë. “Refuzoni gjithçka që ju lodh,” sugjeron Weiss.
“A ka disa gjëra që janë të domosdoshme?” pyet ajo, duke përmendur si shembull mbledhjet familjare. Megjithatë, “aktivitetet jo të domosdoshme janë ato që mund të refuzoni dhe testi është: çfarë është më e keqja që mund të ndodhë nëse them ‘jo’?”
Nëse e kuptoni se nuk ka pasoja të mëdha, atëherë shfrytëzoni mundësinë për të thënë jo dhe për ta përdorur atë kohë për veten tuaj.
Si përfundim, Weiss thotë se “nganjëherë, më pak angazhime sjellin më shumë gëzim.”
