Shumë njerëz e gjejnë veten duke braktisur vendimet e Vitit të Ri përpara përfundimit të janarit. Arsyeja kryesore nuk është mungesa e vullnetit, por mënyra si formulojnë dhe ndjekin qëllimet, sipas Michael J. López, trajner i karrierës dhe konsulent.
Në librin e tij të ardhshëm, “Change: Six science-backed strategies to transform your brain, body, and behavior”, López paraqet strategji që mund të ndihmojnë çdo individ të arrijë objektivat e tij. Ja disa prej sugjerimeve të tij kryesore për të pasur sukses këtë vit.
1. Transformoni “qëllimet e shmangies” në “qëllime të afrimit”
Shumë vendime të Vitit të Ri fokusohen në largimin nga zakone të caktuara, si shmangia e ushqimeve të pashëndetshme ose kufizimi i kohës para ekranit. Këto qëllime, të cilat López i quan “qëllime shmangieje”, shpesh dështojnë për shkak të mungesës së motivimit.
Në vend të tyre, provoni të formuloni “qëllime të afrimit”. Për shembull, në vend që të thoni “Do të porosis më pak ushqim”, përqendrohuni në “Dua të gatuaj më shumë vakte të shëndetshme në shtëpi.” Ky ndryshim i vogël në qasje ndihmon në krijimin e një lidhjeje më pozitive me qëllimin tuaj dhe rrit shanset për sukses.
2. Pjestoni qëllimet tuaja në hapa të vegjël
Vendosja e objektivave të mëdha, ose ndryshimi i një zakoni, mund të duket e pamundur. Në vend të kësaj, pjestoni qëllimin tuaj në hapa të menaxhueshëm. Për shembull, nëse dëshironi të kufizoni pirjen e kafesë, filloni duke zëvendësuar një filxhan në fundjavë me një alternativë tjetër.
Kjo qasje graduale ju ndihmon të ndjeni progresin dhe të përjetoni një ndjesi përmbushjeje që mund të nxisë motivimin për të vazhduar.
3. Fokusohuni te përpjekjet, jo vetëm te rezultati
Rezultatet e mëdha, si humbja e peshës, apo kursimi i parave, kërkojnë kohë dhe durim. Në vend që të përqendroheni te fundi i rrugëtimit, matni përpjekjet tuaja. Për shembull, në vend që të thoni “Dua të humbas 10 kilogramë deri në mars”, përqendrohuni në “Do të bëj ushtrime tre herë në javë.” Monitorimi i përpjekjeve, sipas López, rrit ndjenjën e përmbushjes dhe motivimin për të vazhduar.
4. Krijoni mbështetje sociale
Mbështetja nga miqtë, ose një grup që ndan të njëjtat qëllime është një faktor kyç për suksesin. Kur ndihmoni dikë tjetër të arrijë qëllimet e tij, rritet edhe angazhimi juaj ndaj objektivave personale. Ky efekt, që López e quan “simbiotik”, krijon një ndjenjë të ndërsjellë përgjegjësie dhe përkushtimi.
5. Rregulloni mjedisin tuaj fizik
Një ambient që përforcon zakonet e reja është thelbësor për suksesin. Përgatituni për sukses duke krijuar një mjedis që mbështet objektivat tuaja.
6. Përqendrohuni te një qëllim në një kohë
Përpjekja për të ndryshuar shumë zakone njëherësh mund të jetë mbingarkuese. López sugjeron të fokusoheni vetëm në një qëllim për tre muaj. Pasi të keni arritur sukses me atë objektiv, mund të shtoni gradualisht qëllime të reja.
Vendimet e Vitit të Ri mund të jenë sfiduese, por me një qasje të zgjuar dhe të qëndrueshme, ato janë të realizueshme. Duke formuluar qëllime pozitive, duke vepruar hap pas hapi dhe duke ndërtuar mbështetje sociale, ju krijoni një bazë të fortë për suksesin tuaj afatgjatë.
Cilat janë vendimet tuaja këtë vit? Filloni sot me hapa të vegjël dhe bëni përmirësime të qëndrueshme që do të sjellin ndryshime të mëdha!
