Apple do të përdorë modelet e IA të Google, Gemini, për versionin e ri të Siri-t që pritet të dalë më vonë këtë vit, në kuadër të një marrëveshjeje shumëvjeçare që forcon partneritetin mes dy gjigantëve të teknologjisë në epokën e inteligjencës artificiale dhe rrit pozicionin e Alphabet në garën kundër OpenAI.
Sipas Google, pas një vlerësimi të kujdesshëm, kompania vendosi se teknologjia e IA e Google ofron “bazën më të fuqishme” për Apple Foundation Models. Modelet e Google do të mbështesin gjithashtu edhe funksione të tjera të reja të Apple Intelligence në të ardhmen.
Ky partneritet hap një treg të madh për Google, duke marrë parasysh bazën prej më shumë se dy miliardë pajisjesh aktive Apple. Përveç Samsung Galaxy IA, teknologjia e Google tashmë fuqizon shumë produkte të tjera, por marrëveshja me Apple konsiderohet një “votë e madhe besimi” për gjigantin amerikan të kërkimit.
Në fund të vitit 2024, Apple kishte integruar ChatGPT në pajisjet e saj, duke i mundësuar Siri-t të përdorte ekspertizën e chatbot-it për të përgjigjur në pyetje komplekse. Apple tha se nuk kishte ndryshime të mëdha në këtë integrim, ndërsa OpenAI nuk ka dhënë koment për Reuters.
Marrëveshja e re mund të ngrejë pyetje për partneritetin mes Apple dhe OpenAI. CEO i OpenAI, Sam Altman, raportohet se ka dhënë një “kod të kuq” për të përshpejtuar zhvillimin e teknologjisë pas prezantimit të Gemini 3. Analistët vlerësojnë se ChatGPT do të mbetet i përdorshëm për pyetje komplekse dhe opsionale, ndërsa Gemini do të bëhet inteligjenca e parazgjedhur për Siri.
Google ka përshpejtuar zhvillimin e modeleve të avancuara, si dhe të teknologjive të gjenerimit të imazheve dhe videos, për të sfiduar avantazhin e OpenAI. Ndërkohë, Apple ka hasur disa vështirësi në fushën e IA, përfshirë vonesat e përmirësimit të Siri-t, ndryshime në nivel ekzekutiv dhe pritshmëri të ulëta nga përdoruesit për veglat e saj të gjenerimit të përmbajtjes.
Marrëveshja e fundit forcon gjithashtu partneritetin e gjatë mes dy kompanive, ku Google mbetet motori i parazgjedhur i kërkimit në pajisjet Apple, një marrëveshje që sjell fitime të konsiderueshme për të dyja kompanitë.
Google theksoi se Apple Intelligence do të vazhdojë të funksionojë në pajisjet Apple dhe në Private Cloud Compute, duke ruajtur standardet e larta të privatësisë të kompanisë, për të qetësuar shqetësimet e përdoruesve.
Lajmi për marrëveshjen ndikoi pozitivisht edhe tek vlera e Alphabet, e cila kaloi shifrën e 4 trilionë dollarëve të hënën, me një rritje prej 65% të aksioneve gjatë vitit të kaluar, e nxitur nga optimizmi i investitorëve për avancimet në IA.