Një zgjidhje e zakonshme për një moment mërzie është të kalosh me shpejtësi nëpër video në platformën e mediave sociale të zgjedhur. Por, ky zakon ndoshta po e përkeqëson edhe më shumë problemin, sipas një kërkimi të ri.
‘Kërkimi ynë tregon se ndërsa njerëzit e kalojnë ose shmangin videon për të shmangur mërzinë, është një sjellje që në fakt e rrit mërzinë”, tha autorja kryesore e studimit, Dr. Katy Tam, një postdoktorante e psikologjisë në Universitetin e Torontos në Scarborough.
“Gjithashtu e bën përvojën e tyre të shikimit më pak të kënaqshme, më pak angazhuese dhe më pak domethënëse”, shtoi ajo.
Me një gamë të gjerë argëtimi në majë të gishtave, është e lehtë të supozohet se njerëzit tani janë më pak të mërzitur se kurrë, tha Tam. Megjithatë, nga viti 2008 deri në vitin 2020, kërkimet kanë treguar një tendencë në rritje të mërzisë tek të rinjtë, ka shtuar ajo.
‘Kjo është shqetësuese, sepse mërzia është e lidhur me pasoja negative për shëndetin mendor, mësimin dhe sjelljen, si simptomat depresive, notat më të ulëta në shkollë dhe madje edhe agresionin sadistik”, tha Tam.
Pritshmëritë kundrejt realitetit të mërzisë
Për të hetuar rolin që ka ndërrimi i videove në mërzitje, studiuesit kryen dy eksperimente me rreth 1,200 persona. Në provën e parë, pjesëmarrësit e studimit përjetuan dy përvoja shikimi. Pjesëmarrësit fillimisht panë një video 10-minutëshe pa opsionin për të ndërruar, ose për të kaluar përpara dhe më pas patën një periudhë 10-minutëshe ku mund të kalonin mes shtatë videove 5-minutëshe, sipas studimit.
Në eksperimentin e dytë, pjesëmarrësit panë një video 10-minutëshe në një raund dhe në raundin tjetër u lejuan të kalonin përpara, ose të ktheheshin pas në një video 50-minutëshe.
Pjesëmarrësit parashikuan se do të ndiheshin më pak të mërzitur me opsionin për të ndërruar, ose për të kaluar përpara në të dy eksperimentet, por më vonë raportuan se e gjetën shikimin e një videoje deri në fund më angazhuese, më të kënaqshme dhe më domethënëse, sipas studimit.
“Mërzia është ngushtë e lidhur me vëmendjen tonë”, tha Tam. “Ne ndiejmë mërzi kur ka një hendek mes sa të angazhuar jemi dhe sa të angazhuar duam të jemi. Kur njerëzit vazhdojnë të kalojnë mes videove, ata nuk angazhohen plotësisht me asnjë video të vetme, por në vend të kësaj kërkojnë diçka më interesante.”
E mira dhe e keqja e mërzisë
“Për të kuptuar se çfarë duhet të nxirrni nga ky studim, është e rëndësishme të shqyrtoni më thellë se çfarë është vërtet mërzia”, tha Dr. Pamela Rutledge, drejtoreshë e Qendrës së Kërkimeve për Psikologjinë e Medias, një organizatë e pavarur kërkimore. Ajo nuk ishte e përfshirë në kërkimin.
“Një studim i tillë është i lehtë për t’u keqinterpretuar si një tjetër kritikë ndaj medias dixhitale, në vend që të kuptohet më dobishëm mërzia si një sinjal motivues”, shtoi ajo.
Ashtu si zemërimi ose trishtimi, mërzia është një emocion i pakëndshëm dhe shpesh keqkuptohet ose stigmatizohet.
Ndërsa disa njerëz e barazojnë mërzinë me mungesë ambicie, ajo mund të ketë efekte si pozitive ashtu edhe negative. Mërzia, si të gjitha emocionet negative, është një sinjal që na motivon të ndryshojmë atë që po bëjmë. Në këtë kuptim, ajo është e shëndetshme dhe adaptuese. Nëse e shihni mërzinë si një të metë në vend të një mjeti motivues, do të reagoni ndryshe ndaj saj, shtoi ajo.
Si të qëndroni të angazhuar
Nëse dëshironi të dilni nga rrethi i shfletimit të mërzisë, qëllimshmëria është kyçe.
“Merrni kohën tuaj përpara se të shtypni butonin për të kaluar përpara ose për të shmangur, dhe gjeni mënyra për të qëndruar të fokusuar gjatë shikimit të videove”, tha Tam.
Është gjithashtu e rëndësishme të reflektoni mbi atë që po përpiqeni të shmangni gjatë shikimit të videove, sepse jo gjithçka mund të jetë emocionuese gjatë gjithë kohës, shtoi Tam.
Nuk duhet të ndiheni në faj dhe të turpëruar kur ndiheni të mërzitur, por mund ta përdorni atë si një mundësi për të menduar për aktivitetet që ju japin kuptim dhe sfidë, tha Rutledge. Kërkimet tregojnë se aktivitetet që angazhojnë një aftësi në një mënyrë sfiduese por domethënëse japin një ndjesi më të mirë kënaqësie, sesa ato që thjesht ju mbajnë të zënë, ose ju ndihmojnë të relaksoheni, shtoi ajo.
Në fund, Rutledge inkurajon njerëzit të ‘Bëhen më të vetëdijshëm për mënyrën si përdorin mediat e të gjitha llojeve.’
‘Kujdesuni për humorin tuaj gjatë përdorimit të mediave në mënyrë që të mund të identifikoni kur një përvojë pozitive kthehet në negative”.
