Sipas të dhënave të publikuara nga Eurostat, norma e papunësisë në 21 vendet e eurozonës zbriti në 6.1%, nga 6.2% në dhjetor 2025 dhe 6.3% në janar të një viti më parë. Ekonomistët kishin parashikuar që norma të mbetej e pandryshuar në 6.2%.
Në terma absolutë, kjo përkthehet në rreth 10.77 milionë persona të papunë në të gjithë bllokun e monedhës së përbashkët.
Edhe pa përfshirë Bullgarinë, anëtarja më e re e eurozonës, 20 vendet e para të unionit monetar shënuan përmirësim, megjithëse norma e papunësisë mbeti në 6.2%. Megjithatë, numri total i të papunëve është në rënie, duke reflektuar një treg pune më të qëndrueshëm.
Në të gjithë Bashkimin Europian, papunësia ra në 5.8%, nga 5.9% në dhjetor dhe 6% në janar 2025. Krahasuar me muajin paraardhës, numri i të papunëve u ul me 185 mijë persona në BE dhe me 184 mijë në eurozonë.
Ndër ekonomitë më të mëdha të bllokut, Gjermania dhe Holanda regjistruan normat më të ulëta të papunësisë, me 4% secila. Spanja (9.8%), Franca (7.7%) dhe Italia (5.1%) mbeten në nivele më të larta.
Edhe papunësia tek të rinjtë u lehtësua lehtë, në BE norma ra në 15.1% nga 15.2%, ndërsa në eurozonë zbriti në 14.8% nga 15%.
Treguesit e fundit ekonomik, sugjerojnë se ekonomia e BE-së po tregohet më elastike nga sa ishte parashikuar. Vlerësimet paraprake të Eurostat tregojnë një rritje të Prodhimit të Brendshëm Bruto prej 1.5% në eurozonë dhe 1.6% në të gjithë BE-në gjatë vitit 2025, e mbështetur nga performanca e fortë në sektorë kyç.
Britania e Madhe në kah të kundërt
Në kontrast me eurozonën, papunësia në Mbretërinë e Bashkuar u rrit në 5.2%, niveli më i lartë në pesë vitet e fundit, duke tejkaluar edhe Italinë me 5.1%.
“Bizneset kanë qenë të qarta se politikat qeveritare që rrisin kostot e punës i kanë shtyrë të pezullojnë planet e punësimit dhe mund të kenë përshpejtuar ndryshime me ndikim afatgjatë në krijimin e vendeve të punës,” tha ajo.
Analistët theksojnë gjithashtu ndikimin e mundshëm të inteligjencës artificiale në punësimin e të rinjve. Sipas Hewson, “integrimi i IA në biznese për të rritur produktivitetin është një hap pozitiv, por për të rinjtë që tashmë e kanë të vështirë të hyjnë për herë të parë në tregun e punës, IA mund të reduktojë mundësitë për pozicione fillestare.”
Në një postim në blog, European Central Bank theksoi se inteligjenca artificiale nuk ka shkaktuar humbje të përhapura të vendeve të punës në Europë.
Sipas BQE-së, kompanitë që përdorin gjerësisht IA kanë 4% më shumë gjasa të punësojnë staf krahasuar me ato që nuk e përdorin, pasi shumë prej tyre kanë shtuar punonjës për të zbatuar teknologjitë e reja dhe për të zgjeruar prodhimin.
Megjithëse efektet afatgjata mbeten të paqarta, BQE vlerëson se deri më tani ndikimi i inteligjencës artificiale në tregun e punës është neutral ose lehtësisht pozitiv.
