Me disa vende europiane, që po provojnë javët e punës katër-ditore në muajt e fundit, përfitimet e këtij modeli të ri pune kanë qenë në qendër të vëmendjes.
Së bashku me avantazhet e mundshme të produktivitetit, një javë pune katër-ditore është zbuluar gjithashtu se ka një ndikim pozitiv në gjumë.
Një studim i fundit nga MattressNextDay ka zbuluar se punonjësit, që punojnë katër ditë në javë, flenë një orë më shumë në natë.
Mesatarisht, europianët arrijnë të flenë afërsisht shtatë orë në natë, megjithëse ky numër ndryshon në varësi të faktorëve të tillë, si ekuilibri punë-jetë, cilësia e ajrit dhe sasia e rrezeve të diellit që marrin.
Hulumtimi studioi të dhëna nga 36 vende europiane, për të gjetur se cilat prej tyre kishin ekuilibrin më të mirë dhe më të keq të punës dhe gjumit.
Holanda zë vendin e parë për ekuilibrin punë-gjumë
Holanda ishte në krye të listës për ekuilibrin më të mirë të punës dhe gjumit në Europë.
Sipas një studimi të 2016 Science Advances, holandezët flenë mesatarisht tetë orë e pesë minuta. Vendi ka gjithashtu një nga javët më të shkurtra të punës në Europë, me një mesatare prej 32.2 orë pune.
Të dy këta faktorë kanë rezultuar, që Holanda të ketë një nga nivelet më të larta të kënaqësisë dhe besimit në punë, e tejkaluar vetëm nga Finlanda, Danimarka dhe Islanda, sipas një raporti të fundit nga firma këshillimore dhe analitike Gallup.
Punonjësit në Holandë ishin gjithashtu nga më pak të stresuarit në botë, sipas raportit të Gallup, ndërsa punonjësit në Greqi, Maltë dhe Qipro ishin disa nga më të stresuarit.
Austria ka gjithashtu një ekuilibër shumë të mirë pune-gjumë, me punonjësit që punojnë mesatarisht 33.6 orë në javë. Sipas MedUni Wien, austriakët flenë mesatarisht nga shtatë deri në tetë orë.
Norvegjezët përfitojnë nga jeta në natyrë
Në mënyrë të ngjashme, Norvegjia krenohet me një ekuilibër të lavdërueshëm pune-gjumë, me punonjësit që punojnë mesatarisht 33.9 orë në javë.
Norvegjezët gjithashtu vlerësojnë marrjen e sa më shumë ajrit të pastër dhe kryerjen e një sërë aktivitetesh në natyrë si ski, ecje dhe kajak.
Bollëku i aktiviteteve në natyrë gjithashtu ndihmon shëndetin dhe gjumin. Gjithashtu ul stresin dhe ka përfitime për përmirësimin e humorit, si dhe potencialin për të ndihmuar me çështje shëndetësore, si presioni i lartë i gjakut dhe nivelet e ulëta të vitaminës D.
Turqia dhe Serbia janë ndër vendet që nuk kanë ekuilibër pune-gjumë
Turqia, Serbia dhe Mali i Zi janë ndër vendet me ekuilibrin më të keq punë-gjumë.
Kjo, jo vetëm që mund të ndikojë në produktivitetin në punë, por mund të nënkuptojë edhe një lajm të keq për mirëqenien individuale.
Punonjësit në Turqi kanë javën e punës më të gjatë në Europë, ku mesatarja e javës së punës është 44.2 orë, gjë që mund ta bëjë më të vështirë pushimin dhe relaksimin e mjaftueshëm.
Një studim i ScienceDirect i vitit 2021 zbuloi se, gjatë pandemisë, shqetësimi psikologjik ishte një nga arsyet kryesore të prishjes së gjumit për turqit. Kjo u zbulua të jetë më e lartë tek meshkujt, si dhe tek njerëzit e martuar dhe tek njerëzit me fëmijë.
