Hulumtimet më të fundit kanë zbuluar se zemra përmban një rrjet nervor të pavarur, të cilësuar si një “mini-tru”, që luan një rol kyç në rregullimin e rrahjeve të saj. Ky sistem nervor, shumë më kompleks dhe i specializuar nga sa ishte menduar më parë mund të hapë rrugën për trajtime inovative kundër sëmundjeve të zemrës.
Studiuesit nga Instituti Karolinska dhe Universiteti i Kolumbias kanë eksploruar këtë rrjet duke përdorur “zebrafish” si model. Në të kaluarën, besohej se zemra varej kryesisht nga sistemi nervor autonom, që transmeton sinjale nga truri. Megjithatë, rezultatet e reja tregojnë se rrjeti nervor i zemrës, jo vetëm që transmeton, por edhe përpunon informacione, duke pasur aftësi për të kontrolluar në mënyrë të pavarur ritmin kardiak.
Studiuesit zbuluan disa lloje neuronesh brenda këtij sistemi, përfshirë një grup të vogël që vepron si stimulues natyral i zemrës. Ky ‘mini-tru’ është thelbësor për ruajtjen e ritmit të zemrës dhe funksionon në një mënyrë të ngjashme me trurin, duke menaxhuar funksione të përsëritura si frymëmarrja dhe lëvizja.
Hulumtimi ofron mundësi për të kuptuar më mirë sëmundjet si aritmitë dhe për të zhvilluar terapitë e reja për to. Duke përdorur metoda të avancuara si sekuencimi i ARN-së në nivel qelizor, analiza anatomike dhe teknikat elektrofiziologjike, studiuesit kanë përshkruar përbërjen dhe funksionet e këtij rrjeti nervor kompleks.
Në të ardhmen, synimi është të kuptohet ndërveprimi midis trurit dhe sistemit nervor të zemrës në kushte të ndryshme, si gjatë stresit apo sëmundjeve, duke identifikuar objektiva të reja terapeutike për trajtime të avancuara.
