Në një intervistë të shkurtër me gazetarin Blendi Fevziu, përfaqësues të Aeroportit të Tiranës kanë konfirmuar një lajm të rëndësishëm për pasagjerët shqiptarë dhe ata ndërkombëtarë. Delta Airlines do të ofrojë fluturime direkte midis Tiranës dhe New York-ut duke filluar nga vera e vitit 2026.
Sipas përfaqësueses së aeroportit, të gjitha negociatat me kompaninë Delta Airlines janë përmbyllur me sukses. Kompania ka kryer analizat e saj, ka certifikuar aeroportin në lidhje me standardet e sigurisë dhe ka përfunduar të gjitha procedurat e nevojshme. Megjithëse aspektet ligjore kërkojnë kohën e tyre për t’u finalizuar, vendimi është marrë dhe priten vetëm nisjet e fluturimeve direkte.
Përveç fluturimeve drejt Shteteve të Bashkuara, Aeroporti i Tiranës ka konfirmuar gjithashtu disa destinacione të reja për këtë vit. Ndër to përfshihen Lisbona, Izraeli dhe disa vende të Azisë, të cilat do të jenë fluturime sezonale që do të nisin gjatë kësaj vere.
Aeroporti i Tiranës po përjeton një rritje të jashtëzakonshme të trafikut ajror, duke u shndërruar në një nga aeroportet me zgjerimin më të madh në Ballkan. Sipas parashikimeve, këtë vit pritet të udhëtojnë rreth 12 milionë pasagjerë përmes aeroportit “Nënë Tereza”, duke e vendosur atë ndër nyjet kryesore ajrore të rajonit.
Ky zhvillim i rëndësishëm pritet të forcojë më tej lidhjet ajrore të Shqipërisë me botën dhe të lehtësojë udhëtimet për mijëra pasagjerë që lëvizin mes Europës dhe Amerikës.
