Firma amerikane e udhëtimit, Lyft, njoftoi se do të blejë aplikacionin evropian të taksive Free Now në një marrëveshje prej 175 milionë euro (199 milionë dollarë).
Kompania tha se kjo është blerja e saj e parë në Evropë dhe se marrëveshja pritet të mbyllet në gjysmën e dytë të vitit 2025. Pas bashkimit të dy kompanive, ato do t’u shërbejnë mbi 50 milionë përdoruesve të kombinuar në vit.
E themeluar në vitin 2009 si myTaxi, Free Now është një platformë udhëtimi me seli në Hamburg, Gjermani. Që nga viti 2019, kompania është në pronësi të përbashkët të gjigantëve gjermanë të automobilave BMW dhe Mercedes-Benz.
Aplikacioni është i disponueshëm në mbi 150 qytete në nëntë vende, përfshirë Irlandën, Mbretërinë e Bashkuar, Gjermaninë dhe Francën. Përveç shërbimeve tradicionale të taksive dhe transportit me porosi, Free Now ofron gjithashtu opsione të tjera lëvizshmërie, si e-skuterë, e-motoçikleta dhe biçikleta elektronike.
Kompania është fitimprurëse në bazë të fitimeve para interesit, borxhit dhe amortizimit (EBITDA), duke gjeneruar rezervime bruto mbi 1 miliard euro në vitin 2024, sipas një fletë-fakti të saj.
‘Tani është koha’
Përvetësimi i Free Now do t’i japë Lyft-it një rrugë për t’u zgjeruar në tregun shumë konkurrues evropian të transportit, ku do të përballet me kompani si Uber, Bolt i Estonisë dhe Gett i Izraelit.
CEO i Lyft, David Risher, deklaroi: “Blerja prej 200 milionë dollarësh e Free Now na bën një kompani globale.”
Risher shtoi se kompania po hyn vetëm tani në Evropë, sepse pa një mundësi për zgjerim pas përmirësimit të vazhdueshëm të shërbimit në Amerikën e Veriut.
Duke theksuar se e enjtja do të shënojë dyvjetorin e tij si CEO i Lyft, Risher tha: “Kur fillova, për fat të keq, po humbnim pjesë të tregut, po humbnim para. Nuk po bënim aq mirë as për udhëtarët dhe as për shoferët.”
“Tani, ne ju marrim rreth një minutë më shpejt, anulimet nga ana e shoferëve janë ulur në më pak se 5%, dhe shoferët po fitojnë miliarda dollarë në platformë. Operacioni ynë në Kanada është dyfishuar këtë vit në krahasim me vitin e kaluar.”
Ai shtoi: “Pra, duke parë nivelet e larta të shërbimit dhe faktin që edhe ndërkombëtarisht, si në Kanada, po ecim mjaft mirë, thamë: ‘E dini çfarë, tani është koha.’”
Rivali më i afërt vendas i Lyft, Uber, ka një fillim më të hershëm në treg, pasi u lançua për herë të parë në Mbretërinë e Bashkuar në vitin 2012. Që atëherë, kompania është përballur me një sërë çështjesh rregullatore.
Rregullatorët e transportit të Londrës janë përpjekur dy herë të ndalojnë Uber për shkak të shqetësimeve të sigurisë. Kompanisë më në fund iu dha një licencë e re për të vazhduar operimin në qytet në vitin 2022.
