Arkiva e pasur e studios së parë fotografike shqiptare e Pietro dhe Kel Marubit është shpallur zyrtarisht pjesë e Regjistrit Ndërkombëtar ‘Memory of the World’ nga UNESCO.
Drejtori i muzeut kombëtar të fotografisë “Marubi”, Luçjan Bedeni, ka theksuar se, ky është një nga vlerësimet më të larta për trashëgiminë kulturore dhe një nder i madh për Shqipërinë.
“Një nga thesaret më të çmuara të kujtesës sonë kombëtare shpallet tashmë trashëgimi botërore!
Nga zemra e Shkodrës, kjo pasuri e rrallë fotografike që ka përjetësuar imazhin, jetën, historinë dhe shpirtin e shqiptarëve, merr sot vlerësimin më të lartë ndërkombëtar!
Ky nuk është thjesht një vlerësimin i kontributit të Marubëve, themeluesve të fotografisë shqiptare, por edhe një vlerësim i jashtëzakonshëm për Shkodrën, qytetin që i dha jetë artit, kulturës dhe kujtesës së një kombi.
Shkodra, qyteti me 2400 vjet histori që mbart thelbin e kulturës dhe krenarisë shqiptare. Shkodra e muzikës, e teatrit, e kinemasë dhe e fotografisë sot ka arritur të njihet si e tillë para gjithë botës. Sipas Bedenit, kultura dhe tradita nuk janë leskra të së shkuarës, por ushqim i së tashmes, pse pikërisht ajo Shkodër ishte edhe qyteti i guximit, ku u hodhën hapat e para të revoltave antikomuniste dhe të demonstratave demokratike. Sot, kjo histori e madhe është bërë pjesë e trashëgimisë botërore, përmes imazheve që ruajnë kujtimin e ngjarjeve të mëdha”.
Koleksionet e Pietro dhe Kel Marubit, përmes dëshmisë fotografike, janë pasqyra të gjalla të jetës dhe ngjarjeve të kaluara, kronikë e paharrueshme e ndryshimeve që ka përjetuar Shqipëria. Këto koleksione, që datojnë nga shekulli XIX dhe fillimi i shekullit të XX, janë limfa e përbashkët kulturore që projekton rrugëtimin historik në trungun e popujve europianë.
