Komisioni Evropian njoftoi të martën se ka gjobitur markat luksoze Gucci, Chloe dhe Loewe me më shumë se 157 milionë euro (182.5 milionë dollarë) për shkelje të rregullave të konkurrencës të BE-së.
Komisioni tha se markat kishin “kufizuar aftësinë e shitësve me pakicë të palëve të treta të pavarura me të cilët bashkëpunojnë për të vendosur çmimet e tyre të shitjes me pakicë online dhe offline” duke diktuar çmimet minimale të shitjes për produktet e tyre.
Për më tepër, Komisioni tha se sjellja anti-konkurruese e ndërmarrë nga kompanitë çoi në çmime më të larta dhe më pak zgjedhje për konsumatorët.
Markat e modës akuzohen për fiksim çmimesh
“Të tre kompanitë e modës ndërhynë në strategjitë tregtare të shitësve me pakicë duke u vendosur kufizime, të tilla si kërkesa që ata të mos devijojnë nga çmimet e rekomanduara të shitjes me pakicë; normat maksimale të zbritjeve; dhe periudha specifike për shitjet”, tha Komisioni në një deklaratë.
Pronari i Gucci -t, Kering, një kompani shumëkombëshe franceze me 17.2 miliardë euro të ardhura të raportuara në vitin 2024, tha se hetimi i BE-së u zgjidh në bashkëpunim të ngushtë midis markës dhe Komisionit dhe se gjoba financiare ishte regjistruar tashmë në rezultatet e gjysmës së parë të vitit 2025 të grupit.
Richemont, kompania zvicerane që zotëron Chloe; dhe LVMH , pronari i Loewe, nuk kanë komentuar mbi vendimin e Komisionit.
Richemont, e cila ka investime në gjithçka, nga bizhuteritë te armët e zjarrit, raportoi 19.5 miliardë euro të ardhura vjetore në vitin 2023.
Konglomerati francez i mallrave luksoze LHVM raportoi 84.7 miliardë euro të ardhura në vitin 2024.
