Bashkimi Evropian po ofron 5.5 milionë euro (6.2 milionë dollarë) për të mbështetur Radion Evropa e Lirë/Radio Liberty (RFE/RL) pasi transmetuesi humbi fondet publike të SHBA-së.
Administrata e Presidentit të SHBA-së, Donald Trump, pezulloi financimin për transmetuesin 75-vjeçar në mars, duke e akuzuar atë për promovimin e një axhende lajmesh me paragjykime liberale.
Por, shefja e politikës së jashtme të BE-së, Kaja Kallas, tha se blloku po liron fondet e emergjencës si një “rrjet sigurie për gazetarinë e pavarur “.
Çfarë tha BE-ja?
Kallas foli për rëndësinë e Radios Evropa e Lirë në rezistencën ndaj regjimeve autoritare. E themeluar gjatë Luftës së Ftohtë, qëllimi i transmetuesit ishte t’u jepte lajme njerëzve nën sundimin komunist.
Kallas foli për akordimin e Radios Evropa e Lirë gjatë fëmijërisë së saj në Estoni, pjesë e ish-Bashkimit Sovjetik.
“Duke ardhur nga ana tjetër e Perdes së Hekurt, në fakt ishte [nga] radioja që morëm shumë informacion,” tha ajo. “Pra, ka qenë një pishtar demokracie, shumë i vlefshëm në këtë drejtim.”
Cila është rëndësia e financimit nga BE-ja?
Kallas tha se fondet e siguruara nuk do të jenë në gjendje të mbështesin të gjitha 27 gjuhët e Radios Evropa e Lirë në 23 vende në të gjithë Evropën Lindore, Azinë Qendrore dhe Lindjen e Mesme.
Megjithatë, do të përqendrohet në vendet në rajone të tilla si Azia Qendrore dhe Kaukazi.
“Në një kohë të rritjes së përmbajtjes së pafiltruar, gazetaria e pavarur është më e rëndësishme se kurrë”, u tha Kallas gazetarëve pas një takimi të ministrave të jashtëm të BE-së në Bruksel.
Fondet e BE-së do ta ndihmonin transmetuesin “të punonte dhe të funksiononte në ato vende që janë në fqinjësinë tonë dhe që varen shumë nga lajmet që vijnë nga jashtë”.
Avokatët e Radios Evropa e Lirë e kanë kundërshtuar vendimin për të shkurtuar financimin e tyre në gjykatë.
Një gjyqtar i Gjykatës së Qarkut në SHBA vendosi një pezullim të përkohshëm të urdhrit të Trump për të ndërprerë grantet për disa media të financuara publikisht, përfshirë Radion Evropa e Lirë, por një gjykatë federale e apelit e bllokoi vendimin këtë muaj.
