Panairi ndërkombëtar i biznesit dhe tregtisë së jashtme “IMEX-Castilla y León”, i cili këtë vit u organizua në Valladolid (Spanjë), shërbeu si një vend takimi i rëndësishëm midis sipërmarrësve që synojnë të rriten ndërkombëtarisht dhe ekspertëve në sektorët përkatës për çdo vend pjesëmarrës.
Mes përfaqësive ekonomike dhe tregtare nga 30 vende, ishte e pranishme edhe Dhoma e Tregtisë dhe Industrisë së Tiranës, e cila nëpërmjet përfaqësuesit të zyrës së DHTIT në Spanjë, z. Eduard Hyseni, i shoqëruar nga z. Juan Jose Gonzalez Saez, këshilltar ekonomik i Përfaqësimi i DHTIT, asistoi kompanitë e interesuara për mundësitë e zgjerimit të biznesit në Shqipëri.
Për të orientuar sa më mirë planet e tyre të investimeve, sipërmarrësit u njohën nga përfaqësues të DHTIT me sektorët prioritarë për investimet në Shqipëri, kuadrin ligjor për investimet, klimën e biznesit, procedurat lehtësuese, masat mbështetëse etj.
Një nga sektorët me peshë në investimet e huaja është edhe energjia. Falë pozicionit të favorshëm gjeografik dhe kushteve klimatike, Shqipëria ka një potencial të konsiderueshëm të burimeve të rinovueshme të energjisë. Kështu, kompanitë e interesuara u njohën me kushtet dhe prezantimin e potencialit të Shqipërisë në këtë fushë.
Gjithashtu, në Konferencën e Ndërkombëtarizimit të Biznesit IMEX-Castilla y León, u trajtuan tema të ndryshme, që nga mundësitë e rritjes në tregjet e huaja të SME-ve, sfidat e sektorit agroushqimor në kontekstin ndërkombëtar, qëndrueshmëria industriale, deri te tendencat në logjistikë dhe financimin ndërkombëtar.
