Në një kohë kur shumë biznese përpiqen të rriten me shpejtësi dhe të tërheqin vëmendjen e tregut përmes risive të mëdha apo hyrjes në industri në zhvillim, ekziston një e vërtetë më pak e dukshme, por shumë e fuqishme: disa nga kompanitë më jetëgjata në botë nuk janë ndërtuar mbi ide revolucionare, por mbi modele të thjeshta, të kuptueshme dhe të qëndrueshme. Ato kanë arritur të mbijetojnë dhe të lulëzojnë për dekada – madje për shekuj – duke ruajtur vazhdimësinë, vlerat dhe mënyrën se si e bëjnë biznesin.
Kjo është një nga pikat që trajtohet në librin Another Way: Building Companies That Last… and Last… and Last, nga autori Bo Burlingham dhe bashkautori i tij Dave Whorton. Në thelb, libri ofron një reflektim mbi arsyet pse disa kompani mbijetojnë në kohë më shumë se të tjerat, dhe çfarë mund të mësojnë sipërmarrësit nga këto raste.
Sipas autorëve, shumë prej këtyre kompanive nuk kanë operuar në industri të jashtëzakonshme apo me ide të reja teknologjike. Përkundrazi, ato kanë funksionuar në fusha të zakonshme si shitja me pakicë, shërbimet ndaj klientit apo prodhimi, por kanë qëndruar të palëkundura në përkushtimin e tyre për cilësi, qëndrueshmëri dhe kulturë të brendshme.
Një element që doli në pah nga kërkimi i autorëve ishte struktura e pronësisë. Sipas Burlingham, vetëm dy lloje kompanish arrijnë të ruajnë cilësitë që i bëjnë të mbijetojnë për më shumë se dy breza: ato që janë në pronësi familjare dhe ato që janë në pronësi të punonjësve.
Këto struktura u mundësojnë bizneseve të mbajnë një drejtim të qartë dhe t’i rezistojnë presioneve afatshkurtra të tregut. Kur kompania është në duart e atyre që e menaxhojnë apo që kanë lidhje të thella emocionale dhe kulturore me të, vendimet merren me më shumë përgjegjësi dhe vizion afatgjatë.
“Ka një pjesë të tërë të ekonomisë që nuk njihet shpesh publikisht – kompani private që kanë qenë të suksesshme për shumë kohë, por që nuk kanë qenë kurrë në qendër të vëmendjes,” vëren autori. Pikërisht këto biznese janë shembulli se si mund të ndërtohet një kompani që zgjat – jo për pak vite, por për breza të tërë.
Ky mesazh është veçanërisht i rëndësishëm për sipërmarrësit shqiptarë, të cilët shpesh përballen me presionin për të “bërë namin” shpejt. Në realitet, forca e një biznesi nuk matet vetëm me fitimin vjetor apo numrin e ndjekësve në rrjetet sociale, por me aftësinë për të ndërtuar diçka që zgjat, që respekton klientët, punonjësit dhe komunitetin.
Për ta thënë ndryshe: ndonjëherë, rruga më e sigurt drejt suksesit nuk është të bësh diçka spektakolare, por të bësh gjënë e duhur – vazhdimisht, me përkushtim dhe vlera.
