Evropa po avancon me ritme të shpejta në adoptimin e inteligjencës artificiale, ndërsa disa vende kanë nisur ta integrojnë këtë teknologji në mënyrë të dukshme në jetën e përditshme. Një raport i fundit i Microsoft tregon se, që nga lançimi i ChatGPT në vitin 2022, mbi 1.2 miliardë njerëz në mbarë botën kanë përdorur mjete të IA-së me një ritëm më të shpejtë se interneti, kompjuteri personal apo telefoni inteligjent.
Sipas raportit, Bashkimi Europian është ndër rajonet më dinamike në këtë drejtim, me vendet më të zhvilluara ekonomikisht që udhëheqin adoptimin. Irlanda kryeson me 41.7% të popullsisë, e cila përdor rregullisht IA-në në punë ose në jetën e përditshme.
Jashtë BE-së, shifrat janë edhe më të larta: 45.3% e norvegjezëve dhe 36.4% e britanikëve përdorin IA në mënyrë të rregullt, duke e renditur Norvegjinë në krye.
Në anën tjetër, nivelet më të ulëta të përdorimit regjistrohen në Rumani (15.3%) dhe Greqi (17.7%), ku përfshirja e teknologjive të inteligjencës artificiale në jetën e përditshme mbetet ende e kufizuar.
Raporti nënvizon se adoptimi i IA-së lidhet ngushtë me fuqinë ekonomike dhe infrastrukturën teknologjike të vendeve. Në vendet e Global North, përdorimi arrin rreth 23%, ndërsa në Global South vetëm 13%.
Faktorë si qasja në energji të qëndrueshme, lidhja e shpejtë me internetin, kapacitetet kompjuterike dhe niveli i arsimit ndikojnë drejtpërdrejtë në ritmin e adoptimit. Ndërkohë, rreth 4 miliardë njerëz në botë vazhdojnë të jetojnë në zona ku mungesa e infrastrukturës dhe barrierat gjuhësore pengojnë përdorimin e IA-së.
