Konfindustria, me rastin e miratimit në komisione të Projektligjit të Buxhetit 2026 dhe paketës shoqëruese të ashtuquajtur “Paqja Fiskale”, i bën thirrje Kuvendit të Shqipërisë që të ndërhyjë gjatë shqyrtimit në seancë plenare për të bërë ndryshimet e domosdoshme në funksion të mbështetjes së industrive vendase dhe prodhimit kombëtar.
Në njoftimin e firmosur nga Administratori i Përgjithshëm, Gjergj Buxhuku, Konfindustria paraqet tre kërkesa kryesore:
1. Ulja me të paktën 20 lekë/litër e Taksës së Qarkullimit për karburantet
Sipas Konfindustrisë, kostot e larta të karburanteve kanë dobësuar ndjeshëm konkurrueshmërinë e prodhimit vendas, duke çuar shumë sektorë deri në prag falimentimi. Uljat e propozuara konsiderohen të domosdoshme për të mbrojtur prodhuesit shqiptarë nga efektet e kostove të larta operative.
2. Hartimi i një skeme të re të integruar fiskale për bujqësinë
Organizata kërkon ndërtimin e një mekanizmi modern, të harmonizuar me modelet e Bashkimit Europian, që të kombinojë politikën e TVSH-së, instrumentet tregtare dhe skemat e mbështetjes financiare.
Konfindustria argumenton se skema aktuale e paraqitur në paketën fiskale është “jo funksionale, e destinuar të dështojë dhe që favorizon qartësisht importet, duke dëmtuar fermerët dhe sektorin bujqësor vendës”.
3. Përjashtimi nga ‘Paqja Fiskale’ i bizneseve të privilegjuara
Sipas Konfindustrisë, në këtë nismë nuk duhet të përfshihen subjektet që operojnë me kontrata PPP, koncesione, licenca të posaçme apo në ambiente jo-konkurruese.
“Bizneset e privilegjuara nuk mund të trajtohen njësoj me bizneset që operojnë në treg të lirë”, thuhet në njoftim.
Konfindustria thekson se ndërhyrjet e kërkuara janë të domosdoshme për të garantuar kushte të drejta konkurruese, për të mbështetur prodhimin vendas dhe për të shmangur deformimet në treg që mund të shkaktohen nga paketat e reja fiskale.
