Korriku i këtij viti është regjistruar si muaji i tretë më i nxehtë në botë që kur kanë filluar matjet, njoftuan ekspertët e klimës të enjten.
Temperatura mesatare e ajrit në sipërfaqen e Tokës arriti në 16.68°C gjatë këtij muaji, që është 0.45°C më e lartë se mesatarja për korrikun gjatë viteve 1991-2020.
Në disa vende, si në Gjirin Persik, Irak dhe për herë të parë edhe në Turqi, temperaturat kaluan 50°C. Ndërkohë, reshje të shumta shiu shkaktuan viktima dhe përmbytje në Kinë dhe Pakistan.
Fundi i një serie muajsh me temperatura rekord (për momentin)
Pas shumë muajsh me temperatura më të larta se zakonisht, në korrik nuk u thye ndonjë rekord i ri, por kjo nuk do të thotë se ngrohja globale ka ndaluar.
“Dy vjet pas muajit më të nxehtë të korrikut ndonjëherë, seria e rekordeve është ndalur,” tha Carlo Buontempo, drejtori i Shërbimit të Ndryshimeve Klimatike Copernicus të BE-së.
“Por kjo nuk do të thotë që ndryshimet klimatike kanë përfunduar. Po vazhdojmë të shohim efektet e një bote që po ngrohet.”
Edhe pse korriku i këtij viti nuk ishte aq i nxehtë sa ai i 2023-ës (më i nxehti ndonjëherë) apo i 2024-ës (i dyti më i nxehtë), temperaturat ishin 1.25°C më të larta krahasuar me periudhën paraindustriale (1850-1900).
“Vazhduam të përjetojmë ndikimet e një klime më të ngrohtë përmes valëve të nxehtësisë ekstreme dhe përmbytjeve katastrofike,” shtoi Buontempo.
Shkaku kryesor: djegia e lëndëve fosile
Rritja e temperaturave lidhet kryesisht me djegien e karburanteve si nafta, qymyri dhe gazi natyror.
“Nëse nuk marrim masa të shpejta për të ndalur shtimin e gazrave ndotës në atmosferë, duhet të presim jo vetëm rekorde të reja temperaturash, por edhe pasoja më të rënda nga ndryshimet klimatike,” paralajmëroi Buontempo.
