Këtë vit, bota është dëshmitare e një përputhjeje të rrallë astronomike, pasi dita e parë e Ramazanit në kalendarin hixhri përkon astronomikisht me 1 mars 2025 po ashtu edhe në kalendarin gregorian, sipas Majed Abu Zahra, president i Shoqatës Astronomike të Xhedës.
Ai shpjegoi se kalendari hixhri bazohet në ciklin hënor, ku çdo muaj fillon me vëzhgimin e hënës së re. Viti hixhri ka 354 ose 355 ditë, duke e bërë atë rreth 10 deri në 12 ditë më të shkurtër se viti gregorian.
Nga ana tjetër, kalendari gregorian është një kalendar diellor që varet nga rrotullimi i Tokës rreth Diellit dhe ka 365 ose 366 ditë në një vit të brishtë, siç është 2024, gjë që ndikon në sinkronizimin e tij me kalendarin hixhri.
Abu Zahra theksoi se, për shkak se viti hixhri është më i shkurtër se ai gregorian, muajt hixhri spostohen gradualisht në kalendarin gregorian me 10 deri në 12 ditë çdo vit. Si rezultat, muajt hixhri kalojnë nëpër të gjitha stinët gjatë një cikli prej rreth 33 vitesh. “Një sinkronizim i tillë i saktë – siç është rasti i 1 Ramazanit 1446 që përkon me 1 mars 2025 – ndodh vetëm kur ciklet hënore dhe diellore janë në harmoni, dhe kjo përputhje pasqyron saktësinë matematikore dhe astronomike në lëvizjen e Hënës dhe Tokës.
Një përputhje e tillë nuk është e zakonshme, por përsëritet në një mënyrë të ngjashme çdo 33 vjet, ndonëse në muaj të ndryshëm,” tha ai.
Ai gjithashtu vuri në dukje se ky fenomen unik në vitin 2025 është një kujtesë e rëndësishme për fleksibilitetin dhe ndryshimin e kohës. “Kjo nxjerr në pah gjithashtu përputhshmërinë midis cikleve astronomike mbi të cilat bazohen të gjitha sistemet kalendarike,” shtoi ai.
