Meta, kompania mëmë e Facebook, Instagram dhe WhatsApp, po përgatitet për një hap të madh në fushën e infrastrukturës globale të internetit. Aktualisht, Meta është përgjegjëse për 10% të trafikut fiks dhe 22% të trafikut celular global dhe pritet që investimet e saj në inteligjencën artificiale ta rrisin më tej këtë ndikim. Për të përballuar këtë nevojë, Meta planifikon të ndërtojë një kabllo nënujore me fibra optike, një projekt që mund të zgjasë vite dhe të kushtojë mbi 10 miliardë dollarë.
Kablloja, që pritet të jetë 40,000 kilometra e gjatë, do të jetë e para në pronësi të plotë të Metës, një hap që sinjalizon synimin e kompanisë për të patur kontroll të drejtpërdrejtë mbi trafikun e të dhënave globale. Rruga e saj do të përshkruajë një formë “W” rreth globit, duke lidhur SHBA-në me Indinë, Afrikën e Jugut dhe Australinë. Meta synon të shmangë zonat me rrezik gjeopolitik, si Deti i Kuq dhe Ngushticat e Malakës, për të siguruar stabilitet dhe besueshmëri.
Sipas ekspertëve, projekti reflekton zhvendosjen nga pronësia tradicionale nga operatorët e telekomit drejt gjigantëve të teknologjisë. Kablloja do të ndihmojë Metën të përmirësojë cilësinë e shërbimeve dhe të mbështesë rritjen e përdoruesve globalisht, veçanërisht në tregje kyçe si India, e cila ka miliona përdorues të platformave të saj.
Krahas përfitimeve teknologjike dhe strategjike, disa ekspertë sugjerojnë se kablloja mund të përdoret për projekte të fuqishme të inteligjencës artificiale në Indi, duke shfrytëzuar kostot më të ulëta dhe një treg të madh të qendrave të të dhënave. Ndërkohë, Meta mbetet në fazat fillestare të planifikimit dhe pritet të zbulojë detaje të mëtejshme në vitin 2025.
