Qeveria ka vënë në dispozicion mbi 50 milionë euro për përballimin e pasojave të reshjeve intensive dhe përmbytjeve të fundit, bëri të ditur ministri i Financave, Petrit Malaj, gjatë mbledhjes së Komitetit Ndërministror të Emergjencave Civile.
Sipas tij, rreth 30 milionë euro janë planifikuar në programin e Emergjencave Civile si shpenzime kapitale. Nga kjo shumë, 15 milionë euro do të përdoren për projekte që synojnë parandalimin e fatkeqësive natyrore dhe rritjen e qëndrueshmërisë së infrastrukturës.
Një tjetër fond, në vlerën rreth 10 milionë euro, është parashikuar si transfertë e kushtëzuar për emergjencat civile. Ky fond do të administrohet nga Ministria e Mbrojtjes dhe do të shpërndahet tek njësitë e vetëqeverisjes vendore, bazuar në një metodologji që merr parasysh hartën e riskut.
Ministri Malaj theksoi gjithashtu se fondi rezervë i Këshillit të Ministrave, rreth 25 milionë euro, do të përdoret për vlerësimin dhe kompensimin e dëmeve të shkaktuara nga përmbytjet, në përputhje me vlerësimet që do të kryhen nga strukturat përgjegjëse.
Paralelisht, një fond prej 5 milionë eurosh është alokuar për sigurinë e digave dhe rezervuarëve, duke u fokusuar në projekte kapitale që synojnë mbrojtjen e infrastrukturës ujore.
Në total, sipas ministrit të Financave, fondet e disponueshme për përballimin e situatës aktuale të emergjencave civile tejkalojnë vlerën e 50 milionë eurove.
