NASA publikoi të mërkurën imazhe të reja të kometës ndëryjore 3I/ATLAS, vizitori i tretë i konfirmuar ndonjëherë nga një sistem tjetër yjor në sistemin tonë diellor. Objekti shfaqet si një pikë e ndritshme drite e rrethuar nga një aureolë e turbullt gazi dhe pluhuri, me disa imazhe që zbulojnë edhe bishtin e tij të zbehtë dhe të zgjatur.
Kometa 3I/ATLAS u zbulua për herë të parë në korrik, duke tërhequr vëmendjen e shkencëtarëve dhe amatorëve të astronomisë për mundësinë e rrallë për të vëzhguar nga afër një objekt ndëryjor. Imazhet e reja u morën nga anijet kozmike të NASA-s, përfshirë satelitët PUNCH, Observatorin Diellor dhe Heliosferik, MAVEN dhe Perseverance Rover, gjatë periudhës nga fundi i shtatorit deri në mesin e tetorit. Publikimi i tyre u vonua për shkak të mbylljes së qeverisë, e cila pezulloi punën në NASA dhe agjenci të tjera federale.
Para 3I/ATLAS, vetëm dy objekte të tjera janë konfirmuar si vizitorë ndëryjorë në sistemin tonë diellor: Oumuamua në vitin 2017 dhe kometa 2I/Borisov në vitin 2019.
Edhe pse vizita e kometës ka nxitur teori të ndryshme, përfshirë mundësinë e origjinës jashtëtokësore, shkencëtarët e NASA-s theksojnë se nuk ka prova që të mbështesin pretendime të tilla.
“Sigurisht që nuk kemi parë asnjë shenjë teknologjike apo ndonjë gjë që të na bënte të besonim se ishte diçka tjetër përveç një komete,” tha Nicky Fox, administratore e asociuar e Drejtorisë së Misioneve Shkencore të NASA-s.
Origjina ndëryjore e objektit e bën atë shumë interesant për studime, pasi mund të japë njohuri të reja mbi sistemet yjore përtej sistemit tonë diellor.
“Janë ndryshimet që na joshin kaq shumë,” shtoi Fox. “Mund të jetë nga diçka që ka ekzistuar para sistemit tonë diellor. Kjo është shumë interesante.”
Në javët në vijim, shkencëtarët do të kenë mundësi për të studiuar më hollësisht kometën, duke analizuar pamjen, shpejtësinë, përbërjen kimike dhe origjinën e mundshme.
“Kjo është një mundësi shkencore e re dhe një dritare në përbërjen dhe historitë e sistemeve të tjera diellore,” tha Tom Statler, shkencëtar kryesor për trupat e vegjël të sistemit diellor në NASA.
3I/ATLAS arriti pikën më të afërt me Diellin në fund të tetorit dhe tani po vazhdon udhëtimin nëpër sistemin e brendshëm diellor. NASA parashikon që kometa të shfaqet përsëri pas Diellit deri në fillim të dhjetorit dhe do të kalojë pranë Tokës më 19 dhjetor, në një distancë të sigurt prej rreth 170 milionë miljesh.
Teleskopi Hapësinor James Webb dhe teleskopë tokësorë si WM Keck Observatory në Hawaii pritet të dokumentojnë kometën në dhjetor.
Imazhet e NASA-s bashkohen me ato të Agjencisë Evropiane të Hapësirës, të marra nga Orbiteri ExoMars Trace Gas, i cili e ka ndjekur 3I/ATLAS ndërsa ajo afrohej pranë Marsit. Sipas ESA-s, në atë kohë kometa ishte rreth 18.6 milionë milje larg orbiterit.
NASA vazhdon të përpunojë të dhënat e mbledhura gjatë muajve të fundit dhe pret që informacioni shtesë të ndihmojë shkencëtarët të kuptojnë më mirë këtë vizitor të rrallë ndëryjor.
“Do të ketë më shumë të dhëna që do të vijnë,” tha Statler. “Jo të gjitha janë shpërndarë ende dhe ka ende vëzhgime të tjera në proces.”
