Situata e përmbytjeve vijon të mbetet problematike edhe në ditën e katërt të motit të keq. Sipas bilancit të paraqitur në mbledhjen e Komitetit të Emergjencave Civile, të drejtuar nga kryeministri Edi Rama, deri më tani janë përmbytur 1 587 banesa dhe rreth 13 211 hektarë tokë bujqësore. Për përballimin e situatës, qeveria ka vënë në dispozicion një fond prej 50 milionë eurosh, ndërsa është garantuar dëmshpërblimi për banorët e prekur.
Në disa zona është vërejtur një përmirësim gradual i situatës, me nisjen e tërheqjes së ujit, por Durrësi mbetet ndër qarqet më problematike. Në zonën e Durrësit të Ri (ish-Kënetë), strukturat e emergjencave janë në terren për normalizimin e situatës, ndërsa verifikimet kanë evidentuar deri tani rreth 2 380 banesa të përmbytura. Aktualisht, 356 persona janë evakuuar, prej të cilëve 123 janë akomoduar në hotele dhe pjesa tjetër në konvaleshencat e institucioneve shtetërore.
Në Sukth, niveli i ujit ka nisur të bjerë, veçanërisht në zonën e Vadardhës, megjithatë autoritetet mbeten në gatishmëri. Në këtë zonë janë evakuuar 322 persona, shumica e të cilëve janë strehuar pranë familjarëve.
Prurjet e lumit Vjosa kanë shënuar rënie gjatë natës, duke ndihmuar në tërheqjen graduale të ujit nga zonat e përmbytura. Megjithatë, situata mbetet problematike në fshatin Bishan, ku nënkalimi vijon të jetë i mbuluar nga rreth 2 metra ujë. Ndërkohë, në qarkun e Fierit raportohen ulje të niveleve të lumenjve dhe funksionim normal i infrastrukturës kryesore.
Probleme vijojnë edhe në qarqet e Korçës, Dibrës dhe Elbasanit, ku reshjet e shiut e dëborës, temperaturat e ulëta dhe ngricat kanë shkaktuar ndërprerje të energjisë elektrike dhe bllokime rrugësh, veçanërisht në zonat malore.
Sipas sinoptikanëve, moti i paqëndrueshëm do të vijojë edhe në ditët në vijim, me reshje shiu e dëbore, rënie të temperaturave nën zero gradë dhe erëra të forta, çka mban të lartë rrezikun për përmbytje dhe probleme të tjera infrastrukturore. Autoritetet u bëjnë thirrje qytetarëve të shmangin lëvizjet e panevojshme dhe të tregojnë kujdes maksimal.
