Përfitimet e ecjes për shëndetin fizik dhe mendor janë të njohura prej vitesh, dhe sot ky aktivitet ka fituar shumë mbështetës që e vlerësojnë për thjeshtësinë dhe efektivitetin që sjell. Sipas Dr. Johanna Contreras, kardiologe, ecja ndihmon në aktivizimin e sistemit vaskular, përmirëson qarkullimin e gjakut, përdorimin e sheqerit në trup dhe menaxhimin e inflamacionit. Megjithëse është një aktivitet me ndikim të ulët, i përshtatshëm për të gjitha grupmoshat dhe nivelet e aftësive, dilema mbetet: a është më e rëndësishme të ecim më shumë, apo më shpejt për të arritur përfitime optimale?
Çdo hap ka rëndësi
Dr. Contreras thekson se, në mënyrë ideale, duhet të kombinoni ecjen për distanca të gjata dhe shpejtësinë. Por, nëse koha apo energjia nuk ju lejon të bëni të dyja, mos u shqetësoni, secila prej këtyre qasjeve ofron përfitime të rëndësishme për shëndetin tuaj. “Çdo lloj ecjeje është e vlefshme”, thotë ajo. Nëse nuk mund të planifikoni një ecje të plotë, edhe një ecje në supermarket ose përdorimi i shkallëve në vend të ashensorit bën ndryshim.
Përfitimet e ecjes për distanca më të gjata
Ecja për distanca më të gjata rrit qëndrueshmërinë e zemrës dhe aftësinë për të përballuar ushtrime për periudha më të gjata kohore. Gjatë një ecjeje të tillë, zemra funksionon më shpejt për një kohë më të gjatë, çka ndihmon në forcimin e saj dhe rritjen e qëndrueshmërisë fizike. Për ata që nuk mund të ecin me shpejtësi të lartë, ecja për një kohë të gjatë mund të japë përfitime të ngjashme me ato të ecjes më të shpejtë ose të vrapimit.
Është e rëndësishme që të ruani një ritëm të qëndrueshëm gjatë ecjes, duke siguruar që rrahjet e zemrës të jenë pak të larta dhe që në fund të ecjes të keni djersitur. Për të shmangur mbingarkesën apo dëmtimet, rekomandohet të rrisni gradualisht distancën dhe të përdorni këpucë të përshtatshme.
Përfitimet e ecjes me ritme të shpejta
Nga ana tjetër, ecja më e shpejtë ka efekt më të madh në stimulimin e sistemit kardiovaskular. Sipas Dr. Lauren Hannon Redler, mjeke ortopede dhe specialiste e mjekësisë sportive, ecja me ritme të larta ndihmon zemrën të pompojë më shumë gjak dhe rrit efikasitetin e muskujve në përdorimin e oksigjenit. Përveç kësaj, shpejtësia më e madhe ndihmon në rritjen e metabolizmit dhe në menaxhimin e presionit të gjakut.
Nëse kohëzgjatja është një faktor kufizues, ecja më shpejt mund të jetë alternativa më e mirë, sepse ofron përfitime të ngjashme me ecjen më të ngadaltë, por për një kohë më të shkurtër.
Po për humbjen e peshës?
Kur bëhet fjalë për humbjen e peshës, të dyja qasjet kanë përfitime të ndryshme. Ecja më e ngadaltë, por për një kohë më të gjatë, ju mban në zonën 2 të kardiotreningut, ku trupi përdor yndyrën si burimin kryesor të energjisë. Një studim i vitit 2023 tregoi se kjo qasje rezulton në humbje më të madhe të yndyrës, veçanërisht te gratë pas menopauzës.
Ndërkohë, ecja më e shpejtë djeg më shumë kalori dhe kërkon më shumë nga metabolizmi, çka mund të ndihmojë në arritjen e objektivave për humbje peshe. Megjithatë, humbja e peshës varet nga shumë faktorë të tjerë, përfshirë ushqimin, gjenetikën dhe mënyrën e jetesës.
A duhet të zgjidhni mes njërës apo tjetrës?
Ekspertët pajtohen që më e rëndësishme është që të ushtroni rregullisht, pavarësisht nëse zgjidhni të ecni më larg apo më shpejt. Një qasje e balancuar që përfshin të dyja mënyrat mund të jetë ideale. Për shembull, mund të alternoni ditët kur ecni distanca të gjata me ato kur fokusoheni te shpejtësia.
Në fund të fundit, çelësi është të përshtatni ecjen me stilin tuaj të jetesës, duke siguruar që të jetë një aktivitet i qëndrueshëm dhe i kënaqshëm për ju. Qoftë një ecje e gjatë dhe e ngadaltë, apo një ecje e shpejtë dhe e shkurtër, çdo hap që bëni ju çon drejt një shëndeti më të mirë.
