Investimet globale në teknologjitë hapësinore pritet të vijojnë rritjen edhe në vitin 2026, të mbështetura nga shpenzimet qeveritare për sistemet satelitore me funksion mbrojtës dhe nga interesimi në rritje i sektorit privat për kapacitetet e lëshimit në hapësirë, sipas kompanisë investuese Seraphim Space.
Infrastruktura hapësinore po shihet gjithnjë e më shumë si një prioritet strategjik kombëtar, teksa shtetet po konkurrojnë për tërheqjen e investimeve me synimin për të siguruar avantazh gjeopolitik.
Sipas Seraphim Space, investitorët presin që vrulli i financimeve të udhëhiqet nga shpenzimet për sisteme sovrane satelitore dhe mbrojtje raketore, integrimi i inteligjencës artificiale në pajisjet dhe analizat hapësinore, si edhe nga perspektiva e një oferte publike fillestare (IPO) të kompanisë SpaceX.
“Një IPO e mundshme e SpaceX mund të veprojë si një katalizator i fuqishëm, duke e legjitimuar më tej SpaceTech si një klasë investimi kryesore dhe duke hapur një rrugë më të qartë drejt bursës për një numër në rritje kompanish hapësinore në faza të avancuara,” tha Lucas Bishop, analist investimesh në Seraphim Space.
Investimet në këtë sektor arritën nivele rekord në vitin 2025, me investimet private që u rritën me 48%, në 12.4 miliardë dollarë, përfshirë 3.8 miliardë dollarë vetëm në tremujorin e fundit, sipas të dhënave të Seraphim Space.
Këto shifra tejkaluan kulmin e mëparshëm të vendosur në vitin 2021 dhe shënuan një rimëkëmbje të plotë nga rënia e vitit 2022, duke e lënë sektorin e hapësirës përpara tregut më të gjerë të kapitalit sipërmarrës.
Shtetet e Bashkuara dominuan investimet gjatë vitit të kaluar me 7.3 miliardë dollarë, ose rreth 60% të financimit global, të nxitura nga shpenzimet e mëdha për shërbimet e lëshimit dhe programet e mbrojtjes, përfshirë nismën e Pentagonit të njohur si “Golden Dome”.
Ndërkohë, rritja e investimeve në Europë ishte më e moderuar, ndërsa financimet në Azi mbetën të larta. Kina kontribuoi rreth 2 miliardë dollarë, duke përshpejtuar zhvillimin e kapaciteteve vendase për lëshime në hapësirë dhe prodhim satelitësh.
