Të gjithë sot flasin për inteligjencën artificiale, aq shumë, sa ndonjëherë duket sikur do ta shohim së shpejti edhe në paketimin e drithërave të mëngjesit. Prej vitesh, IA ka qenë fjala më e përdorur në industrinë e teknologjisë. Megjithatë, shumë organizata ende përballen me vështirësinë se si ta shndërrojnë këtë teknologji në një mjet real fitimi.
Veçanërisht në marketing, IA është kthyer në një trend të pandalshëm. Përtej entuziazmit, mbizotëron ende paqartësia. Teknologjia është e fuqishme, por vetëm nëse përdoret me zgjuarsi. “Marketingu më i zgjuar” nuk ka të bëjë me një IQ të lartë në kuptimin tradicional dhe as me delegimin e çdo procesi tek IA.
Për të qenë më efektivë, organizatat mund të fokusohen në katër IQ kryesore të marketingut, të dhënat, kërkimin, rrjetet sociale dhe kulturën. Këto mund të përkufizohen edhe si informacioni, qëllimi, ndikimi dhe identiteti. Së bashku, ato përfshijnë shtyllat kryesore të marketingut digjital, njësoj siç IQ përpiqet të masë inteligjencën njerëzore.
Çdo organizatë mund ta masë “inteligjencën” e saj në mënyra të ndryshme, por ndarja në këto kategori e bën më të lehtë matjen, përmirësimin e performancës dhe rritjen e qëndrueshme.
IQ i informacionit mat aftësinë e një organizate për të mbledhur, organizuar dhe përdorur të dhënat, me qëllim kuptimin e audiencës dhe përmirësimin e vendimmarrjes në marketing. Në një epokë ku çdo klikim dhe ndërveprim lë gjurmë, avantazhin e kanë ato kompani që dinë t’i kthejnë këto gjurmë në veprime konkrete.
Të dhënat reduktojnë hamendësimet, rrisin efikasitetin dhe ndihmojnë ekipet të investojnë buxhetin aty ku ka realisht rezultat. Në një kohë shkurtimesh dhe kursimesh, metrikat e përbashkëta duhet të peshojnë më shumë se opinionet personale dhe të shkurtojnë debatet e panevojshme.
IQ i qëllimit mat sa mirë një biznes kupton nevojat e klientëve. Vlera maksimale krijohet kur kompania arrin të jetë e pranishme pikërisht në momentin kur klienti ka nevojë.
Kur kupton çfarë kërkojnë njerëzit dhe në çfarë momenti, mund të krijosh përmbajtje dhe oferta që duken të dobishme dhe të përshtatshme, jo ndërhyrëse. Për profesionistët e SEO-s, qëllimi është themeli i çdo strategjie të suksesshme.
Miliona përdorues analizojnë fjalë kyçe përmes mjeteve si Google Search Console, Keyword Planner, Google Trends apo SEMrush, për të identifikuar kërkesa me synim të lartë blerjeje. Kjo e lidh përmbajtjen drejtpërdrejt me strategjinë e marketingut dhe e mban të gjithë “hinkën” funksionale.
IQ i ndikimit mat inteligjencën sociale të një organizate. Nuk mjafton vetëm matja e performancës së postimeve. Rreziku i metrikave boshe është gjithmonë i pranishëm. Thelbi është te vëmendja, besimi dhe lidhja e vazhdueshme, elementë që njerëzit i perceptojnë dhe i refuzojnë shumë shpejt kur janë artificialë.
Ndryshe nga qëllimi individual, ndikimi është kolektiv. Një prani e fortë sociale përshpejton njohjen e markës, forcon marrëdhëniet me klientët dhe rrit konvertimet përmes konfirmimit nga të tjerët.
Shumë biznese dështojnë sepse nuk ndërtojnë një ritëm komunikimi që mund ta mbajnë në kohë. Angazhimi nuk është thjesht marketing, është shërbim ndaj klientit, përgjigje të shpejta, dialog dhe vazhdimësi.
IQ i identitetit mat inteligjencën kulturore të një marke. Identiteti është fija lidhëse mes të gjitha kanaleve, faqes, reklamave, rrjeteve sociale dhe përvojës së klientit. Kur identiteti është i fortë, nuk tërheq vetëm vëmendje, por klientët e duhur.
Në tregje gjithnjë e më të zhurmshme, diferencimi nuk vjen më nga karakteristikat teknike, por nga kuptimi. Identiteti ndërton kujtesë, preferencë dhe besim. Ai shërben edhe si filtër vendimmarrjeje, çfarë përmbajtjeje krijohet, me kë bashkëpunohet dhe si shfaqet kompania në publik.
Ky proces nis me qartësimin e misionit, vlerave, pozicionimit, zërit dhe standardeve vizuale, të cilat duhet të zbatohen në mënyrë të qëndrueshme. Më pas, identiteti përforcohet përmes provave konkrete, dëshmi klientësh, vlerësime, raste suksesi dhe rezultate të matshme.
Secili IQ ka rëndësi më vete, por efekti shumëfishohet kur ato funksionojnë së bashku. Ashtu si inteligjenca njerëzore, suksesi nuk varet nga shkëlqimi në një fushë të vetme, por nga ekuilibri i përgjithshëm.
Kompanitë që zhvillojnë IQ-në e të dhënave, kërkimit, ndikimit social dhe identitetit kulturor marrin vendime më të mira, shfaqen në momentin e duhur, ndërtojnë besim në shkallë dhe krijojnë një identitet që mbahet mend dhe ktë kombinim të integruar, inteligjenca artificiale nuk do ta zëvendësojë lehtë.
