Sportistët që do të ngjiten në podium në Lojërat Olimpike Dimërore që zhvillohen këtë muaj në Itali do të marrin medaljet më të shtrenjta në historinë e Olimpiadave. Arsyeja lidhet drejtpërdrejt me rritjen e fortë të çmimeve të metaleve të çmuara në tregjet globale.
Më shumë se 700 medalje ari, argjendi dhe bronzi do t’u ndahen sportistëve më të mirë të botës, nga skitë dhe hokeji në akull, te patinazhi artistik. Ndërsa vlera emocionale e këtyre medaljeve është e pallogaritshme, edhe në terma financiarë ato vlejnë më shumë se kurrë më parë.
Sipas të dhënave të FactSet, që nga Lojërat Olimpike të Parisit në korrik 2024, çmimi i arit është rritur me rreth 107%, ndërsa argjendi ka shënuar një rritje edhe më të fortë prej rreth 200%. Si rezultat, vetëm bazuar në vlerën e metaleve, një medalje ari sot vlen rreth 2,300 dollarë, më shumë se dyfishi krahasuar me Olimpiadën e Parisit. Medaljet e argjendta, që i takojnë vendit të dytë, arrijnë një vlerë prej afro 1,400 dollarësh, gati trefishi i vlerës së tyre dy vite më parë.
Rritja e çmimit të argjendit është nxitur pjesërisht nga kërkesa e investitorëve të vegjël, ndërsa ari është përforcuar nga blerjet e bankave qendrore dhe interesimi i investitorëve për asetet e sigurta, në një klimë të pasigurt politike dhe ekonomike globale.
Medaljet olimpike do të prodhohen nga metale të ricikluara nga Instituti Poligrafik dhe Mint-i Shtetëror Italian. Megjithatë, një medalje ari nuk është e gjitha prej ari. Nga një peshë totale prej 506 gramësh (16 ons troje), vetëm gjashtë gramë janë ar i pastër; pjesa tjetër përbëhet nga argjend.
Medaljet e bronzta, të prodhuara nga bakri, peshojnë rreth 420 gramë (15 ons) dhe kanë një vlerë materiale prej vetëm 5.60 dollarësh për copë, sipas organizatorëve të eventit.
Sipas shtëpisë së ankandeve Baldwin’s me bazë në Londër, medaljet olimpike nuk prodhohen nga ar i pastër që prej Lojërave Olimpike të vitit 1912 në Stokholm. Medaljet e atij edicioni peshonin vetëm 26 gramë dhe, me çmimet e arit të asaj kohe, vlera e tyre ishte më pak se 20 dollarë. E indeksuar me inflacionin amerikan, kjo shumë do të ishte rreth 530 dollarë sot.
Megjithatë, si objekte koleksioni, medaljet olimpike mund të shiten për shuma shumë më të larta se vlera e tyre materiale. Dominic Chorney, drejtues i sektorit të monedhave antike në Baldwin’s, thekson se rëndësia historike dhe simbolike e tyre i bën jashtëzakonisht të kërkuara.
Në vitin 2015, Baldwin’s shiti një medalje ari nga Olimpiada e Stokholmit 1912 për 19,000 paund (rreth 26,000 dollarë). Një vit më pas, një medalje bronzi për pjesëmarrësit e Olimpiadës së Antwerpit 1920 u shit për 640 paund (875 dollarë), pavarësisht se “nuk kishte asnjë vlerë materiale”, por vetëm lidhjen me ngjarjen sportive më të famshme në botë.
Sipas Chorney, shumica e sportistëve nuk i shesin kurrë medaljet e tyre, pasi i konsiderojnë një simbol të përjetshëm të arritjeve personale.
Ndërkohë, pavarësisht luhatjeve të fundit në tregje, çmimet e arit dhe argjendit pritet të mbeten të larta për shkak të pasigurive gjeopolitike dhe rritjes së borxhit publik global. Ole Hansen, drejtues i strategjisë së mallrave në Saxo Bank, shprehet se medaljet e Lojërave Olimpike Verore 2028 ka shumë gjasa të jenë edhe më të shtrenjta se ato të Olimpiadës Dimërore të këtij viti.
