Çdo kompani dëshiron të investojë te njerëzit që kanë më shumë gjasa të arrijnë sukses. Prandaj, shpesh krijohen programe rotacioni, trajnime të personalizuara apo mentorime të posaçme për ata që identifikohen si “punonjës me potencial të lartë”. Por çfarë do të thotë realisht “potencial i lartë”? Si e përcaktojmë atë? A lidhet me diplomën nga një universitet prestigjioz? Apo me karrierën e shpejtë që dikush ka ndërtuar më parë?
A është e mundur që po favorizohen njerëzit e gabuar, thjesht sepse kanë një CV mbresëlënëse?
Ekspertja e burimeve njerëzore Suzanne Lucas, e njohur si “Evil HR Lady”, ka ndarë disa mësime të vlefshme që lidhen me këtë çështje, të cilat i ka nxjerrë jo vetëm nga përvoja e saj profesionale, por edhe nga angazhimi në skenën e improvizimit si aktore dhe instruktore. Për më tepër, ajo ka diskutuar mbi këtë temë edhe me mentoren e saj në improvizim, Jennifer Cain Birkmose – bashkëthemeluese e kompanisë teknologjike Viva Valet që fokusohet në kujdesin për të moshuarit – dhe me Susan Brownfield, themeluese e Boutique Theatre Base.
Ajo që kanë vënë re nga përvoja e tyre në skenë është se potenciali i vërtetë nuk lidhet gjithmonë me talentin e dukshëm apo të menjëhershëm, por me disa sjellje të qëndrueshme që tregojnë gatishmëri për të mësuar, për t’u angazhuar dhe për të përballuar sfidat. Dhe këto sjellje vlejnë njësoj edhe në vendin e punës.
Çfarë nënkupton realisht “potenciali i lartë”
Njerëzit që ndjekin trajnime për zhvillim personal apo profesional vijnë nga profile të ndryshme – që nga drejtues të industrisë farmaceutike deri te nxënës të shkollave të mesme. Disa prej tyre duken që në fillim të talentuar dhe të aftë. Të tjerë janë më të përmbajtur dhe të pasigurt, duke dhënë përshtypjen se rruga drejt përvetësimit të aftësive do të jetë më sfiduese për ta.
Megjithatë, në fund të një trajnimi apo kursi, shpesh ndodh që nuk janë domosdoshmërisht më të talentuarit ata që shkëlqejnë më shumë. Ajo që i bën disa njerëz të dallohen është një kombinim cilësish që lidhen më shumë me qëndrimin dhe përkushtimin sesa me talentin e lindur.
Ekspertja Suzanne Lucas, thekson pesë karakteristika të përbashkëta te personat që arrijnë sukses të vërtetë.
Shpesh, nuk është talenti i lindur ai që përcakton suksesin. Ajo që vërtet bën diferencën janë disa sjellje dhe qëndrime që tregojnë vullnet, përkushtim dhe aftësi për të mësuar. Ja cilat janë pesë karakteristika që vërehen te personat me potencial të lartë – dhe si ato reflektohen në ambientin e punës:
1. Angazhim i plotë
Personat me potencial të lartë përfshihen plotësisht në çdo detyrë, pa hezitim. Ata nuk e pyesin “pse duhet ta bëj këtë?”, por thjesht e bëjnë. Edhe kur një detyrë duket e thjeshtë apo e pazakontë, ata i përgjigjen me përkushtim.
Në punë: Ata nuk janë nga ata që thonë “kjo nuk është puna ime”. Liderët e vërtetë janë të gatshëm të hidhen në veprim kur është e nevojshme, pavarësisht rolit të tyre zyrtar.
2. Gatishmëri për të dështuar
Njerëzit me potencial të lartë nuk e kanë frikë dështimin – përkundrazi, ata e shohin si pjesë të rritjes. Nuk ka përparim pa rrezik dhe pa përpjekje të reja.
Në punë: Ata sjellin ide të reja, marrin fjalën në mbledhje dhe nuk kufizohen duke përsëritur atë që thanë të tjerët. Edhe kur dështojnë, ata mësojnë dhe provojnë sërish.
3. Pranojnë dhe kryejnë detyrat e mërzitshme
Ashtu si në çdo art apo profesion, janë ushtrimet bazë ato që ndërtojnë mjeshtërinë. Edhe pjesët më monotone janë të nevojshme për suksesin afatgjatë.
Në punë: Të lexuarit me kujdes i kontratave, menaxhimi i mirë i email-eve, ndërtimi i procedurave – të gjitha janë pjesë e bazës që përgatit një punonjës për sfida më të mëdha.
4. Vendosin objektiva dhe kërkojnë feedback
Njerëzit me potencial nuk presin vetëm vlerësime nga të tjerët – ata i kërkojnë ato. Ata pyesin si mund të përmirësohen dhe aplikojnë sugjerimet që marrin.
Në punë: Ata kanë qëllime personale karriere dhe i ndjekin në paralel me objektivat e ekipit apo të drejtuesit. Janë të vetëdijshëm se zhvillimi profesional është përgjegjësi personale.
5. Ndërtojnë mbi çdo mësim të mëparshëm
Më të mirët nuk i shohin detyrat apo mësimet si të izoluara. Ata lidhin përvojat mes tyre dhe i aplikojnë në situata të ndryshme.
Në punë: Aftësia për të transferuar njohuritë nga një fushë në tjetrën – për shembull, nga marketingu në operacione – është çelësi i suksesit në ekipet ndërfunksionale dhe në rolet drejtuese.
Potenciali i lartë nuk lidhet vetëm me një CV mbresëlënëse apo me diploma prestigjioze. Ai fshihet edhe te punonjës që ndoshta nuk kanë spikatur në letër, por në sjellje tregojnë përkushtim, aftësi për të mësuar dhe dëshirë për të kontribuar. Nëse i vëreni këto cilësi tek një anëtar i ekipit tuaj, investoni kohë në zhvillimin e tij – dhe do të habiteni nga rritja që do të ndodhë.
