Një histori force, këmbënguljeje dhe suksesi vjen nga Shtetet e Bashkuara të Amerikës, ku Teuta Elshani, shqiptare nga Kosova, ka arritur një nga pozicionet më të larta në fushën e inxhinierisë kimike në një prej kompanive më të mëdha ndërkombëtare.
Pas një rrugëtimi 26-vjeçar pune të pandërprerë, Elshani ka marrë pozicionin e Udhëheqëse Teknike e Kërkimit dhe Zhvillimit (R&D Technical Leader) në Kimberly-Clark Professional për Amerikën e Veriut, duke ushtruar rolin e inxhinieres strategjike – një nivel elitar në industrinë e saj.
Në një postim personal, ajo rrëfen se jeta e saj ndryshoi rrënjësisht më 17 prill 1999, kur lufta në Kosovë i mori familjen dhe e la të vetme në moshën 23-vjeçare. Përballë humbjes së thellë, ajo u përball me një zgjedhje vendimtare: të dorëzohej apo të vazhdonte përpara.
Me një diplomë të fituar në Kosovë në kushte lufte, në një fushë sfiduese si kimia, Teuta Elshani e nisi karrierën në Shtetet e Bashkuara si teknike laboratori. Paralelisht me punën, ajo mësoi një gjuhë të re dhe u integrua në ekipe profesionale ku shumica e kolegëve ishin doktorë të inxhinierisë kimike.
“Me dhimbjen në gjoks dhe kujtimet që më rëndonin, mësova të merrja frymë mes trishtimit dhe të vazhdoja përpara, edhe kur çdo shpresë dukej e humbur,” shprehet Elshani, duke shtuar se sfida e saj nuk përfundoi me mbijetesën, por vazhdoi me përgjegjësinë për të mbajtur gjallë trungun familjar të shkatërruar nga lufta.
Pavarësisht vështirësive të mëdha personale dhe profesionale, ajo nuk u ndal. Me përkushtim, disiplinë dhe profesionalizëm, Teuta Elshani u ngjit gradualisht në hierarkinë profesionale, duke arritur sot një rol drejtues dhe strategjik në një kompani globale me ndikim ndërkombëtar.
