Kostot e mallrave të importuara kanë shënuar rënie në tremujorin e parë të këtij viti. Në të kundërt ka qenë tendenca e prodhuesve që kanë parë një rritje të lehtë të kostove.
Ulet Indeksi i Çmimeve të Importit
Sipas INSTAT, Indeksi i Çmimeve të Importit, në tremujorin e parë të vitit 2025, arriti 107.7, kundrejt vitit 2021 si periudhë bazë.
Krahasuar me tremujorin e parë 2024, indeksi i çmimeve të importit shënoi një ulje me 0.4%, një vit më parë ky ndryshim ishte -1.9%.
Ndryshimi tremujor i indeksit të çmimeve të importit në tremujorin e parë 2025, krahasuar me tremujorin e katërt 2024 ka një ulje prej 0.3%.
Krahasuar me tremujorin e parë 2024, çmimet e importit të produkteve në seksionin “Energjia elektrike, gazi, avulli dhe ajri i kondicionuar” shënuan ulje me 5.5%, pasuar nga seksionet “Furnizimi me ujë, aktivitetet të trajtimit dhe menaxhimit të mbeturinave, mbetjeve” me 1.2%, “Industria përpunuese” me peshën më të madhe prej 94.0%, me 0.1%.
Brenda seksionit “Industria përpunuese” ulja më e madhe e çmimeve vërehet në produktet e aktiviteteve “Konfeksionimi i veshjeve” me 2.1%, pasuar nga “Metalurgjia” me 1.4%, etj. Nga ana tjetër “Industria nxjerrëse” shënoi një rritje me 0.6%.
Rritet lehtë kosto për prodhuesit
Në tremujorin e parë të vitit 2025, Indeksi i Çmimeve të Prodhimit (ICP) arriti 129.7, kundrejt vitit 2021 si periudhë bazë. Indeksi i Çmimeve të Prodhimit shënoi rritje vjetore me 0.4% dhe rritje tremujore 0.3%.
Rritja më e lartë vjetore u shënua në seksionin “Energjia elektrike, gazi, avull dhe ajri të kondicionuar” me 1.0%, e ndjekur nga seksionet “Industri nxjerrëse” 0.7% dhe “Furnizimi me ujë, aktivitetet të trajtimit dhe menaxhimit të mbeturinave, mbetjeve” me 0.5%. “Industria përpunuese” shënoi një rritje me 0.03%.
Brenda këtij seksioni, rritja më e madhe e çmimeve vërehet në aktivitetin “Prodhimi i mobiljeve” me 2.1%, ndërsa ulja më e madhe e çmimeve vërehet në aktivitetin “Metalurgji” me 2.4%.
ICP për tregun vendas: Shënoi një rritje vjetore prej 0.7%. Rritja vjetore më e madhe u vu re në seksionin “Industri përpunuese” me 1.1% dhe në sektorin “Energjia elektrike, gaz, avull dhe ajër të kondicionuar” me 0.8%, ndërsa “Industri nxjerrëse” shënoi një rënie prej 2.8%.
ICP për eksport: Shënoi rritje vjetore prej 0.3%. Rritja më e madhe vjetore u shënua nga seksioni “Industri nxjerrëse” me 2.8%. Ndërkohë, “Industria përpunuese” shënoi një rënie prej 0.2%.
