Ministrja e Shëndetësisë dhe Mbrojtjes Sociale, Albana Koçiu, njoftoi me gëzim se për herë të parë në Spitalin Universitar Obstetrik-Gjinekologjik “Koço Gliozheni” u realizua lindja e bebes së parë përmes teknikës së riprodhimit të asistuar.
Kjo arritje e rëndësishme u mundësua nga profesionalizmi i ekipit mjekësor të Qendrës së Teknikave të Riprodhimit Mjekësor të Asistuar (RMA) të maternitetit, një hap i madh për strukturat spitalore publike në Shqipëri.
Ky sukses është rezultat i investimeve të qeverisë, që kanë mundësuar ngritjen e një qendre moderne për riprodhimin e asistuar, duke e kthyer atë në një model kombëtar të shtatzënisë.
Ministrja Koçiu theksoi rëndësinë e kësaj teknike inovative, e cila bëri të mundur lindjen e bebes, falë një investimi të plotë të shtetit. Ajo theksoi gjithashtu mundësinë që ofrohet tani për çiftet që kanë vështirësi në konceptimin natyral të fëmijës, pasi paketa e fertilitetit është plotësisht e mbuluar nga buxheti i shtetit dhe ofrohet falas për ata që e kërkojnë.
Ministrja falënderoi stafin e mjekëve dhe infermierëve të Qendrës së Riprodhimit të Asistuar për përkushtimin dhe angazhimin e tyre, që e mundësuan realizimin e suksesshëm të kësaj procedure të rëndësishme për herë të parë në një strukturë spitalore publike. Ajo gjithashtu vizitoi ambientet e Qendrës së Teknikave të Riprodhimit, e cila është e pajisur me teknologjinë më moderne dhe ka një staf të kualifikuar për këtë procedurë.
