Festat shpesh na mbushin me pritshmëri dhe presion.Mendon se duhet të jesh i lumtur, i përzemërt, i përmbushur ,por kjo periudhë nuk është gjithmonë e lehtë. Në një realitet të mbushur me konflikte, kriza dhe paqartësi ekonomike, tensioni i fundvitit rëndon edhe më shumë mbi ne. Pra, ndonjëherë “Gëzuar Festat” mund të tingëllojë si një detyrim, jo si një ndjenjë reale.
Por nuk duhet të jetë kështu. Ekspertët sugjerojnë të mos kërkojmë ekstazën ose euforinë e përkryer, por të gjejmë “lumturinë e vogël” , atë ndjesi të brendshme të qetësisë, të lidhjes dhe kënaqësisë reale që mund të gjendet në momentet e vogla. Këtu janë 12 veprime të vogla, por të fuqishme, që mund t’ju ndihmojnë të ndiheni më mirë dhe më të qetë këtë sezon festash:
-
Emërtoni emocionet tuaja
Kur ndiheni të mbingarkuar, ndaloni dhe përshkruani atë që ndjeni. Një fjali e thjeshtë si “jam i lodhur” ose “jam pak i shqetësuar” mund të qetësojë trurin dhe të ulë stresin. -
Shprehni mirënjohje ndaj një personi të veçantë
Në vend të gjërave materiale, falënderoni dikë në jetën tuaj, fqinjin që pastron dëborën, kolegun që ju mbështet, ose mikun që ju bën të qeshni. Ky akt lidhje e thellon ndjesinë e komunitetit dhe ngrohtësinë e zemrës. -
Vëzhgoni gjërat pozitive ose neutrale
Truri ynë fokusohet natyrshëm tek shqetësimet. Kërkoni qëllimisht diçka të thjeshtë që ju sjell qetësi, ndoshta një dritë festive, aromën e një biskote të ngrohtë, ose buzëqeshjen e një kalimtari. -
Rikujtoni një moment të bukur çdo ditë
Para gjumit, kujtoni një gjë të mirë që ndodhi gjatë ditës, një bisedë e këndshme, një kafe që ju ngroh shpirtin, një moment gazmor. Kjo sjell qetësi dhe ndihmon për të ruajtur energji pozitive. -
Largohuni nga krahasimet e panevojshme
Mediat sociale shpesh na bëjnë të ndjehemi sikur jeta jonë nuk është e mjaftueshme. Merrni një pushim, dhe kujtoni se të gjithë kemi ditë të mira dhe të këqija.
-
Qëndroni të pranishëm përmes shqisave
Dëgjoni muzikën, shijoni një ëmbëlsirë, prekni teksturën e një dhurate. Këto momente ju dhurojnë kënaqësi dhe largojnë stresin. -
Shprehni mirënjohje në heshtje
Në takimet e mëdha familjare, mendoni për dikë që përpiqet, për dikë që ju mbështet, pa e thënë me zë të lartë. Ky gjest i thjeshtë aktivizon ndjenjën e empatisë dhe lidhjes. -
Bëni një akt të vogël bujarie
Një buzëqeshje, një falënderim i sinqertë, një pije e ngrohtë me një mik, veprime të vogla që lënë gjurmë të mëdha. Ato jo vetëm rrisin humorin tuaj, por edhe lidhjet me të tjerët. -
Mos kini pritshmëri
Mos prisni që gjithçka të shkojë sipas planit. Prisni ngarkesë ose vonesa dhe do të ndiheni më të qetë. Nëse gjërat shkojnë më mirë se sa prisnit, kënaqësia do të jetë edhe më e madhe. -
Ngadalësoni veprimet tuaja
Ngadalësoni veprimet tuaja, ndërveprimet, ushqimin, pjekjen e një ëmbëlsire. Ngadalësimi i vetëdijshëm qetëson trupin dhe mendjen. -
Shijoni natyrën
Dilni në ajër të pastër, shikoni yjet, dritat e festës ose një pemë të thjeshtë. Kjo ju bën të ndiheni më të lidhur me botën dhe njerëzit rreth jush. -
Festoni fitore të vogla çdo ditë
Çdo gjë e përfunduar, madje edhe e vogël, si rregullimi i shtratit ose dërgimi i një kartoline, është një sukses që ndihmon të ndërtoni motivim dhe energji pozitive.
Këto veprime të vogla nuk e largojnë plotësisht stresin, por krijojnë një lumturi të brendshme, të qëndrueshme dhe të vërtetë. Festat nuk duhet të jenë perfekte, lumturia e vërtetë ndodh në momentet e vogla dhe të përditshme.
Jennifer Moss, folëse ndërkombëtare dhe autore e librave për lumturinë dhe kulturën e punës, sugjeron: Momente të sinqerta dhe mirënjohje të vogla janë më të fuqishme se pritshmëritë e larta ose gëzimi i rremë. Kjo krijon një ndjesi reale lumturie që mund t’ju mbajë të qetë dhe të lidhur gjatë gjithë vitit të ri.
