Në një intervistë të zhvilluar me Zërin e Amerikës, Kryeministri i Shqipërisë, Edi Rama, ka komentuar një sërë çështjesh të rëndësishme lidhur me zhvillimet e vitit 2024.
Rama theksoi se Shqipëria është angazhuar për të përmbushur detyrat e saj për të mbyllur bisedimet e integrimit në Bashkimin Europian deri në vitin 2027. Ai theksoi se administrata shqiptare është e përgatitur dhe do të përballojë me sukses këtë proces. “Kemi një strategji të miratuar nga Komisioni Europian, dhe ne do të vazhdojmë të punojmë për të përmbushur detyrat brenda afatit të caktuar,” tha ai.
Në lidhje me korrupsionin, Rama e pranoi se ky ishte një problem real, por shtoi se nuk mund të krahasohej me situatën e kaluar, kur pandëshkueshmëria ishte e zakonshme. “Ne kemi ndërmarrë hapa konkretë për të luftuar korrupsionin, duke modernizuar administratën dhe duke përmirësuar sistemin e drejtësisë,” deklaroi ai.
Duke komentuar hetimet ndaj zyrtarëve të lartë, Rama shpjegoi se ishte i qetë dhe i bindur për procesin e reformës në drejtësi, pavarësisht hetimeve që po zhvilloheshin. “Ligji dhe drejtësia duhet të kenë përparësi, dhe nuk është detyra ime të ndërhyj në hetime apo procese gjyqësore,” tha ai, duke komentuar rastin e Erion Veliajt dhe Jurgis Çyrbjas.
Kur u pyet për ekonominë, Rama mbrojti modelin ekonomik të Shqipërisë, duke nënvizuar se rritja kishte ardhur nga shumë sektore, jo vetëm nga ndërtimi dhe turizmi. “Ndërtimi ka qenë një fazë e rëndësishme, dhe rritja e numrit të pasagjerëve në aeroportin e Tiranës tregon përparimin,” tha ai.
Në lidhje me bujqësinë, ai theksoi se sektori ka përjetuar një periudhë kalimtare për shkak të vonesave në investimet nga programet e BE-së. “Vitin e ardhshëm, bujqësia do të shohë një rritje më të madhe si rezultat i masave të reja,” premtoi ai.
Për zgjedhjet e ardhshme, Kryeministri Rama e vlerësoi fitoren e Partisë Socialiste si të sigurt, duke shtuar se ekipi i ri dhe i fuqishëm do të sjellë një parti më konkurruese, të orientuar te puna dhe jo te fjalët e tepërta. “E kam fituar çdo garë deri tani dhe do ta vazhdoj ta bëj këtë,” përfundoi ai.
