Edicioni i pestë i Rame Lahaj International Opera Festival sjell një bashkëpunim të jashtëzakonshëm artistik: për herë të parë, Orkestra Simfonike e Radiotelevizionit Shqiptar do të ngjitet në skenë në Prishtinë, me mbështetjen e Zyrës së Kryeministrit të Shqipërisë.
Ky institucion prestigjioz, i nderuar me titullin “Nderi i Kombit”, do të performojë në Gala Mbrëmjen “Rame Lahaj & Friends” më 2 gusht, ora 20:30, në Sheshin Skënderbeu, nën dirigjimin e një emri të njohur ndërkombëtarisht, Maestro Roberto Rizzi Brignoli.
Themeluar më 16 maj 1962, Orkestra Simfonike e RTSH-së ka luajtur një rol kyç në formësimin e skenës muzikore shqiptare dhe vazhdon të ndërtojë ura përmes artit e muzikës klasike.
Ky bashkëpunim është më shumë se një ngjarje muzikore — është një dëshmi se arti nuk njeh kufij. Shqipëria dhe Kosova, të bashkuara përmes zërit dhe harmonisë, dëshmojnë se fryma kulturore është mbi çdo ndarje.
Ju ftojmë të bëheni pjesë e kësaj mbrëmjeje unike më 2 gusht, në zemër të Prishtinës!
