Ushtria zvicerane i ka bërë thirrje kompanive të teknologjisë, studiuesve dhe startupe-ve që të ndihmojnë në transformimin e bunkerëve të vjetër të luftës në qendra moderne mbrojtjeje, duke përdorur zgjidhje novatore dhe me kosto të ulët.
Pas një periudhe të gjatë pa përdorim që nga vitet ’90, Zvicra po rishqyrton rolin e rrjetit të saj të bunkerëve të ndërtuar në kohë lufte. Ky vendim është nxitur nga shqetësimet e shtuara për sigurinë pas agresionit të plotë të Rusisë ndaj Ukrainës.
Bëhet fjalë për rreth 8,000 bunkerë të shpërndarë në të gjithë vendin, disa prej të cilëve datojnë që nga viti 1886, të ndërtuar fillimisht për të ruajtur zona strategjike si hekurudha Gotthard dhe kalimet alpine. Këta bunkerë ishin pjesë e rëndësishme e sistemit të “Redoubt Kombëtar”, një rrjet fortifikatash të ngritura për të ndaluar pushtimet gjatë Luftës së Dytë Botërore dhe Luftës së Ftohtë.
Në atë kohë, shumë prej tyre ishin të pajisur me teknologji mbrojtëse të avancuar, për të përballuar kërcënimet nga raketat sovjetike. Megjithatë, pas përfundimit të Luftës së Ftohtë, përdorimi i tyre ra ndjeshëm për shkak të prerjeve buxhetore dhe ndryshimeve në prioritetet ushtarake. Shumë nga këto struktura madje u shitën qytetarëve.
Disa blerës u dhanë funksione të pazakonta: si bodrume për djathë, galeri arti, qendra për ruajtjen e të dhënave apo edhe hotele. Disa u kthyen madje në kasaforta të sigurisë së lartë për kriptomonedhat, si rasti i “Swiss Fort Knox” në kantonin e Bernës.
Por në vitin 2023, ushtria zvicerane ndaloi të gjitha shitjet e mëtejshme të këtyre strehimoreve dhe nisi vlerësimin e mënyrave për t’i rikthyer ato në funksion.
“Duhet të përfitojmë nga çfarë kemi,” u shpreh Shefi i Ushtrisë Zvicerane, Thomas Süssli. Natyra e kërcënimeve ushtarake ka ndryshuar. Bunkerët ndodhen në pozicione të pafavorshme dhe armët që përmbajnë do të mbeten funksionale edhe për dhjetë deri në njëzet vjet të tjera,” tha ai.
Qëllimi i ushtrisë është që t’i shndërrojë këto bunkerë në qendra mbrojtjeje të vështira për t’u sulmuar, duke aplikuar teknologji të avancuara, me investime të përballueshme dhe nevojë minimale për staf.
Përveç qëllimeve ushtarake, disa kantone i kanë përshtatur strehimoret edhe për përdorime civile, si strehë të përkohshme për refugjatët.
Sipas mediave lokale, Shoqata Zvicerane për Teknologji dhe Forca të Armatosura do të organizojë një “ditë inovacioni” në mes të shtatorit, ku do të zbulohen më shumë detaje dhe pjesëmarrësit do të kenë mundësi të prezantojnë idetë e tyre.
“Ne po kërkojmë ide nga të gjitha fushat, jo vetëm nga sektori i mbrojtjes,” theksoi shoqata.
